Derxistina keviran ji çiyayê Lêlûnê, jêdera sereke ya qûta şêniyên gundên Şêrewayê ye.
Lê dorpêça ku hikumeta Şamê li ser herêmê ferz kiriye û topbarana artêşa Tirk a dagirker, jiyana şêniyan asteng kiriye.
Kevirên Çiyayê Lêlûn jêdera qûta şêniyên gundên Şêrawayê ne
Malên wan gundan bi kevirên xam ên ku bi destan hatine rakirin, hatine avakirin.
Şêniyên wan gundan bi derxistina keviran û xwedîkirina sewalan debara xwe peyda dikin.
Keviran ji çiyê der dixin, piştre di kargehekê de li gorî pîvan û teşeyên ku bazirgan dixwazin, tên jêkirin.
Ev kevir di avakirin û pêçana malan de tên bikaranîn.
Kesên di vê pîşeyê de kar dikin, rûyê keviran bi dest an jî bi amûrên taybet neqş dikin.
Bihaya metreyeke kevir piştî ku hate derxistin li gorî kalîteyê bi 6 hezar lîreyên Sûriyê tê firotin.
Hin caran veguhestina wê bi amûrên mezin digihêje 300 hezar Ls.
Apê Silêman Hisên ji şêniyên gundê Mezin e, xwediyê werşeya qutkirina kevir e û ji 13 saliya xwe ve, vî karî dike.
Şêniyên gundên Şêrawa di çêkirina kevir û veguhestina wê de ji parêzgehên Sûriyê re gelek zehmetiyan dikişînin.
Apê Silêman anî ziman ku gundên me di navbera dorpêça hikumeta Şam û artêşa Tirk a dagirker de mane, yek êrîş dike yê din jî bacan ferz dike .
Karkerê bi navê Hemo Hisên (55) destnîşan kir ku wan jiyana xwe li çiyayê Lêlûn di nava keviran de borandiye.
