Çeteyên DAIŞ’ê revandin û şehîdxistina rêveberên Meclisa bajarokê Til El-Şayir girt ser xwe. Meclisa Jinan a Sûriyê û Meclisa Jinan a Bakur û Rojhilatê Sûriyê armanckirina her du rêveberên jin weke sûcekî hovane li dijî mirovahiyê bi nav kir û bang li NY kir ku ji bo bidawîkirina sûc û tundiya li ser jinan, bixebitin
22’ê Çileyê, Hevseroka Meclisa bajarokê Til El-Şayir ê girêdayî navçeya Deşîşayê Seida Feysel El-Hermas û cîgira wê Hind Letîf El-Xidêr hatibûn revandin û piştî rojekê cinazeyên wan hatin dîtin.
Çeteyên DAIŞ’ê bi daxuyaniyekê ku li ser malpera xwe weşandiye, revandin û şehîdxistina Seida û Hind Letîf El-Xidêr girt ser xwe.
Bertekên li dijî armanckirina her du jinan jî zêde dibin û şehîdxistina herdu rêveberên jin bi sûcekî li dijî mirovahiyê hat pênasekirin.
Meclisa Jinan a Sûriyê û Bakur û Rojhilatê Sûrî: Divê NY ji bo bidawîkirina sûc û tundiya li ser jinan bixebitin
Meclisa Jinan a Sûriyê û Meclisa Jinan a Bakur û Rojhilatê Sûriyê şehîdxistina her du rêveberên jin şermezar kir û weke hedefgirtina projeya demokratîk a bi pêşengtiya jinan bi nav kir.
Meclisê ev kirina hovane weke sûcekî qirêj li dijî mirovahî û li dijî jinan dît û got:
“Armanca ji vê yekê hedefgirtina projeya neteweya demorkatîk û projeya Rêveberiya Xweseriya Demokratîk e ya ku jinên Bakur û Rojhilatê Sûriyê pêşengtiya wê dikin ku bi keda bi hezaran şehîdên ji hemû pêkhateyan hatiya damezirandin û li xweşiya dijminên mirovahî û gelan nehat.”
Meclisa Jinan a Sûriyê û Meclisa Jinan a Bakur û Rojhilatê Sûriyê bang li Neteweyên Yekbûyî û hemû rêxisitnên hiqûqî kir ji bo bidawîkirina sûc û tundiya li ser jinan, bixebitin.
Kongra Star a Şamê, şehîdxistina her du jinan şeremezar kir
Kongra Star a Şamê jî bi daxuyaniyeke çepemeniyê li taxa Zorava şehîdxistina her du rêveberên jin şermezar kir û got:
“Em bang li hemû aliyên têkildarî mafên mirovan dikin ku li hemberî komên ku jinan direvînin û dikujin bisekinin û hesab ji wan û alîkarên wan bixwazin.”
Tevgera Jinên Kurd a li Ewropayê (TJK-E) jî, diyar kir ku ev êrîş li dijî vîna jina azad hate kirin û tê xwestin ku jin bên bêdengkirin, lê têkoşîna azadiyê ya jinan wê bi ser bikeve.