Cîgirê Hevserokatiya Meclisa Rêveber a Rêveberiya Xweser Hemdan El-Ebid teqez kir ku bêyî beşdarbûna Rêveberiya Xweser, Komîteya Destûr bi ser nakeve. El-Ebid destnîşan kir ku divê destûreke nû were avakirin ku mafên hemû pêkhateyan misoger bike.”
Hemdan El-Ebid, Cîgirê Hevserokatiya Meclisa Rêveber a Rêveberiya Xweser destnîşan kir ku binketina Komîteya Destûrî encama destwerdanên derve ye.
Komîteya Destûra Sûriyê ya bi serperiştiya NY, ji encama Kongreya Soçiyê ye ya 2018an ji aliyê Rûsyayê ve hatibû lidarxistin.
Erka vê komîteyê, destûreke nû ji Sûriyê re deyîne û aloziya Sûrî bi dawî bike, lê li ser erdê destûra ku niha dixwazin çêbikin, tenê jinûve-sazkirina destûra heyî û biparvekirina kursiyê desthilatiyê ye.
Nûnerê NY yê taybet bo Sûriyê Geir Pedersen, ku ev komîte rêya xelasê didît, piştî 5 gerên bêencam, bêhêvîbûna xwe anî ziman.
Di van gerên hatine lidarxistin de, netevlîbûna Rêveberiya Xweser a vê komîteyê, encama destwerdanên derve ye.
Heman tiştê ku Cîgirê Hevserokatiya Meclisa Rêveber Hemdan El-Ebid jî piştrast dike, ye.
Ev komîteya Destûrî, derbaskirin û windakirina demê ye.
Ji bo çareseriyê, tenê çareseriya leşkerî bijartine, weke me li Hema û Idlibê dît.
Ev yek jî encama biparvekirina par û serweriyê ye.. çi Îran, çi Tirkiyê yan Rûsya be.
Çareseriya leşkerî li şûna siyasî disepînin.
Me ev jî di hemû gerên komîteyê de dîtin.
Hemdan El-Ebid: Divê destûreke nû were avakirin ku mafên pêkhateyan misoger bike
Li gorî El-Ebid, xebatên komîteyê ji dervî erkên komîteya destûrî ne û bi siyaseta derbaskirina demê û di nava detayan de fetistandinê bi kar tîne.
Cîgirê Hevserokatiya Meclisa Rêveber anî ziman ku bêyî beşdarbûna Rêveberiya Xweser Komîteya Destûr bi ser nakeve, lewra teqez kir ku divê destûreke nû were avakirin ku mafên hemû pêkhateyan misoger bike û hilbijartinên demokratîk bi serperiştiya NY li dar bixe.
Berî lidarixistina dawîn ger jî, Pedersen ne rasterast be jî, weke îşaret bi Rêveberiya Xweser, behsa bibinketina van civînan kiribû, ku nebeşdarbûna hemû nûnerên Sûrî, xebatên çareseriyê asteng dike.
Herêmên Bakur û Rojhilatê Sûrî weke cihên herî ewle li welat tên naskirin û di birêveberina wan de, hemû pêkhate mil bi mil bi hev re ne.
Li gel vê û tevî ku MSD bi her awayî ji bo çareyekê di nava hewldanan de ye, dûrî Komîteya Destûrî hatiye xistin.
