Yek ji bajarên herî zêde kuştin û mirinên biguman yên jinan lê tê jiyîn bajrê Wanê yê Bakurê Kurdistanê ye. Aktîvîstên jin diyar kirin ku kujerên jinan diyarin, her roj jin ji aliyê mêr – dewletê ve tên kuştin, lê wekî bi guman didin nişandan.
Li Tirkiyê û Bakurê Kurdistanê di nava 2 mehên destpêkê yê vê salê de 48 jin hatin kuştin û 19 jin jî bi awayekê guman dan nîşandan.
Yek ji bajarên ku mirinên biguman û kuştina jinan lê tê jiyîn Wan e.
Derbarê mijarê de, Aktîvîstên jin nêrînên xwe anîn ziman.
Endama Komeleya Jinan a STAR civaknas Meryama Aslan ku ev saleke li Wan û navçeyên wê li qada tundiya li dijî jinê dixebite axivî û got:
Tundiya zayendî ji ber olî û kevneşopî tê nirxandin, pir caran li ser daxwaza mêr têkiliya zayendî tê jiyîn.
Dema jin li dijî vê dertê jî rastî tundiya fîzîkî tê, lê dîsa jî jin di nava tundiyê de têkoşîna jiyanê dike.
Meryam Aslan da zanîn ku gelek jin serî li me didin û wiha anî ziman:
Me bi kesên serî li me dane re bernameyek pêk anî û me ew guhdar kirin. Ew jî daxwaza şopandinê dikin.
”Ji ber jin serî natewînin tên kuştin”
Aktîvîsta TJA’yê Aynur Sarica jî balkişand ser mirinê biguman yên jinan û wiha pê de çû:
Gumanbarên jinan diyar in. Mêr bi hêrsa desthilatdariyê dibêje “ya tu serî ditewînî yan jî tu yê bê kuştin” û ji ber jin serî natewînin û bêdeng namînin tên kuştin.
Ji ber vê jî em bang li hemû jinan dikin ku li dijî tundiyê bêdeng nemînin û bên cem hev.
Em wek TJA bi kampanya xwe em ê xwe bigihînin tevahî jinan.
