Li bajarê Meiribê yê Yemenî 17 sivîlan di êrîşeke Hûsiyan de, jiyana xwe ji dest da. Li aliyekî din, Hevpeymaniya Erebî ragihand ku hêzên wan droneke Hûsiyan a ku ber bi bajarê Xemîs Mişît ê Siûdiyê ve hatibû berdan, rûxand.
Li Yemenê, tevî bangên herêmî û navdewletî yên rawestandina şer û bidawîkirina hevrikiyê, roj bi roj, kuştin û wêrankirin zêdetir dibin.
Li bajarê Meiribê şeva Şemiyê, çekdarên Hûsî mûşekeke palistîk avête sotemenîgehekê.
Di encamê de, 17 sivîlan “di nav de keça 5 salî Leyan Tahir Mihemed Ayid” û bavê xwe, jiyana xwe ji dest da.
Li gorî agahiyan, bi dehan kes bi giranî birîndar bûne.
Wezîrê ragihandinê: divê ny çekdarên hûsî bixe lîsteya terorê
Piştî vê komkujiyê, Wezîrê Ragihandina Yemenî Muemer Iryanî li ser Twîttera xwe got:
“Civaka navdewletî çavê xwe ji hovîtiyên Hûsiyan digire. Divê NY van çekdaran bixe lîsteya terorê.”
Li Beydayê sivîlekî ji ber teqîna mayineke Hûsiyan jiyana xwe ji dest da
Jixwe berî vê komkujiyê, li parêgeha Beydayê sivîlekî ji ber teqîna mayineke Hûsiyan jiyana xwe ji dest dabû.
Li devera Qetabayê ya bajarê Xoxeyê, cotkarek di dema çûna bistanê xwe de, bi mayineke Hûsiyan birîndar bû.
Berdevkê Hûsiyan: Me bi drona “QASIF 2k” baregeha Melik Xalid armanc kir
Li aliyekî din, berdevkê fermî yê Hûsiyan Yehya Serîi ragihand ku vê sibehê baregeha “El-Melik Xalid” a li bajarê Xemîs Mişêt aramanc kir.
Yehya Serîi diyarkir ku bi rêya drona “QASIF 2k” baregeh hat armanckirin.
Hevpeymaniya Erebî: Pergala me drona Hûsî bêbandor kir
Berovajî gotina berdevkî Hûsî, Hevpeymaniya Erebî destnîşan kir ku pergala wan a asîmanî drona navorî bêbandor kir û rûxand.
Li gorî berdevkê Hevpeymaniyê Tirkî El-Malikî, Hûsî ji da ku binkeftinên xwe yên li Cewf û Meiribê binixumînin, van sextenûçeyan belav dike.
