Ji bo piştevaniya Ukrayna, lîderên Fransa, Almanya û Îtalya berê xwe dan Kîevê.
Tevî piştevaniya bo Ukrayna, ji bo endamtiya YE jî wê nîqaş werin kirin.
Hemwextî vê, Serokê DYA Biden alîkariya 1 mîlyar dolarê din bo Ukrayna ragihand.
Tevî vê, wê moşekên HIMARS yên pir lûle jî heta dawiyê bigihêjin Ukrayna.
Di demekî ku êrişa Rûsya ya li ser Ukrayna nêzî meha xwe ya 4. dibe şerê li rojhilatê welat dijwar bûye.
Rûsya ya di girtina bajarê Severodontsk de israr dike, bê navber êriş dike.
Serdozgeriya herêma Çernihiv bi daxuyaniyekê ragihand ku ji ber êrişên Rûsya heta niha 478 sivîl li herêmê hatine kuştin.
692 jî birîndar bûne.
Scholz, Macron û Draghi li Kîevê ne
Ji bo piştevaniya Ukrayna, lîderên Fransa, Almanya û Îtalya berê xwe dan Kîevê.
Doh êvarî her sê serok piştî nîvê şevê bi trênê çûne balafirgeha bajarê Rzeszow a li başûrê rojhilatê Polonya.
Lîderên gihiştin nava xaka Ukrayna, li qadên wêrankirî yên welat geriyan.
Serlêdana endamtiya Ukraynayê ya ji bo Yekîtiya Ewropayê (YE) û şandina çekan ji bo wî welatî yek ji mijarên sereke yên nîqaşa Serokomarê Fransa Emmanuel Macron, Serokwezîrê Almanya Olaf Scholz û yê Îtalya Mario Draghi ye.
27 serokên dewlet û hikûmetên Yekîtiya Ewropayê wê hefteya bê li Brukselê ji bo gotûbêjkirina serîlêdana endamtiya Ukraynayê bicivin.
Komîsyona YE ragihand ku ew ê vê hefteyê pêşniyarek li ser dayîna statuya berendamê ya Ukraynayê wekî gava yekem a pêwîst bide.
Lê belê biryara dawî ya li ser namzetiya Ukraynayê wê ji aliyê welatên endam ve bê dayîn.
Ji destpêka êrişa Rûsya ya li ser Ukraynayê gelek lîderan serdana Kîevê kir.
Lê, ev serdana Scholz, Macron û Draghi pir bi watey tê dîtin.
Almanya, Fransa û Îtalya sê welatên herî qelebalix û aborî yên herî bihêz ên YE ne.
Her sê dewlet di nav welatên G7 ku niha Almanya serokatiya wê dike de ye.
Her wiha Fransa jî niha serokatiya YE dike.
Biden paketek alîkariya 1 mîlyar dolar bo Kîevê ragihand
Serokê Dewletên Yekbûyî yên Amerîkayê Joe Biden doh pakêtek nû ya alîkariya ewlehiyê ya 1 mîlyar dolarî ji bo Kîevê ragihand.
Bi vê pakêta alîkariyê re nirxa çekan a ji DYA’yê ji bo Ukraynayê ji destpêka êrişa Rûsyayê heta niha gihişt 5,6 mîlyar dolarî.
Serokomarê Ukraynayê Volodymyr Zelensky bi telefonê bi Biden re axivî, spasiya wî kir.
Zelensky got;
Ev alîkarî bi taybetî ji bo xeta parastinê ya li Donbasê girîng e.
Amerîka: Heta dawiya mehê wê moşekên himars bigihêjin Ukrayna
Serokê Fermandariya Giştî yê DYA Orgeneral Mark Milley di daxuyaniya çapemeniyê de ragihand ku sîstema HIMARS ya moşekên pirlule wê heta dawiya mehê bigihêjin destê Ukrayna.
Ev moşek tevî cebilxane û personelên xwe yên perwerdekirî wê were şandin.
