Siyaseta dewleta Tirk a qutkirina avê û kêmbûna wê di bendavên herêmê de, bi xwe re encamên neyînî tîne û bandorê li herêmê bi giştî dike.
Ji ber van siyasetên qirêj, peydakirina ava vexwarinê zehmet dibe û xebatên bendavan rojane bi saetên dirêj tên rawestandin.
Li ser qutkirina ava çemê Firatê ji aliyê dewleta Tirk a dagirker ve, Endamê rêveber ê Bendava Rojava (Tişrîn) Hemûd El Hemadîn ji malpera fermî ya Rêveberiya Xweser re axivî.
Hemûd El Hemadîn diyar kir, ji ber siyaseta dewleta Tirk a qutkirina avê, gelek encamên neyênî derketin û got:
Dewleta Tirk a dagirker rêjeya ava çemê Firatê daxistiye 200 metrekab di çirkeyê de û vê yekê li herêmê rewşeke bobelatê derxist.
Para herêmê ya normal 500 metrekab di çirkeyê de ye.
El Hemadîn: Ava golên çemê Firatê ji sedî 85 kêm bûye
El Hemadîn eşkere kir, ku ava bendavan kêm bûye û depoya stratejîk a golên Firatê ji sedî 85’ê avê bendava Tişrînê ji dest daye û wiha dewam kir:
“Vê yekê bandoreke neyînî li avahiyên bendavan, ava vexwarinê û hilberandina kehrebeyê jî kir.
Ji ber rawestandina bendavê û nexebitandina hemû torbînan.
Niha rojê tenê 2 torbîn heta 7 saetan dixebitin û hêza hilberandina kehrebeyê ji 107 megawat daketiye 75 megawat.
Di encamê de, ji sedî 35’ê hilberandina kehrebeyê jî kêm bûye.
Endamê rêveber ê Bendava Rojava (Tişrîn) Hemûd El-Hemadîn destnîşan kir ku bêdengiya NY, rêxistinên hiqûqî û dewletên herêmê, hişt ku rewşa mirovî ya li herêmê aloztir bibe, û wiha bidawî kir:
Divê NY û rêxistinên hiqûqî destwerdanê bikin û van kiryarên dijminane yên dewleta Tirk bi dawî bikin da ku para herêmê ya avê bê dayîn.
