Ji parêzerên Buroya Hiqûqê ya Sedsalê Rezan Sarica û Pisporê ceza û hiqûqa navneteweyî Parêzer Jan Fermon, diyar kirin ku têkildarî Rêber Apo ne hiqûqa navxweyî ne jî peymanên navneteweyî bi cih têne anîn û gotin: “Li ser Tirkiyeyê ti pêkanîn nayê ferzkirin.
Saziyên Ewropayê jî li gorî biryarên xwe tevnagerin.
Ne Tirkiye guh dide pêşniyarên CPT, ne jî CPT li pişt tespîtên xwe disekine.”
Ji parêzerên Buroya Hiqûqê ya Sedsalê Rezan Sarica û Pisporê ceza û hiqûqa navneteweyî Parêzer Jan Fermon, tecrîda giran a li ser Rêber Apo, helwesta saziyên hiqûqê ya navneteweyî û têkoşîna di asta navneteweyî de tê meşandin ji ANF’ê re nirxandin.
Rezan Sarica anî ziman ku tecrîda bênavber a li Îmraliyê li gorî hiqûqa navxweyî û pîvanên hiqûqî yên navneteweyî bi ti awayî nikare bê vegotin û got:
“Di nava 13 salan de rejîmeke ne ji rêzê hatiye danîn ku tenê 5 caran serdana parêzeran, di nava 10 salên dawî de jî tenê 5 caran serdana malbatê karîbûye bê kirin.
Îmrali veguherandine herêmeke welê ku jiyana siyasî û civakî lê hatiye bidawîkirin.”
Rezan Sarica: Agahînegirtina sê salên dawî ne tenê rewşa herî giran a êşkenceyê ye
Rezan Sarica destnîşan kir ku agahînegirtina sê salên dawî rewşa îşkenceyê ye û wiha domand:
“Eger rewşa girtinê li dijî rûmeta mirovahiyê be, eger bi rêk û pêk êşkence tê kirin, hingî ev yek tê wê wateyê ku mafê ewlekarî û azadiyê tê binpêkirin.
Agahînegirtina sê salên dawî ne tenê rewşa herî giran a êşkenceyê ye.”
Rezan Sarica: Tirkiye li gorî peymanan tevnagere, pêkanîn nayê ferzkirin
Rezan Sarica destnîşan kir ku têkildarî Abdullah Ocalan ne hiqûqa navxweyî ne jî peymanên navneteweyî bi cih nayên anîn û wiha dewam kir:
“Tirkiye li gorî peymanên navneteweyî tevnagere ku aliyekî wê ye.
Saziyên Ewropayê jî li gorî biryarên xwe tevnagerin.
Ne Tirkiye guh dide pêşniyarên CPT, ne jî CPT li pişt tespîtên xwe disekine.”
Parêzer Jan Fermon: Li gorî hiqûqa navneteweyî ev tecrîd neqanûnî ye
Pisporê ceza û hiqûqa navneteweyî Parêzer Jan Fermon jî li ser tecrîda îmraliyê axivî.
Parêzer Jan Fermon got ku tecrîda ku li ser Abdullah Ocalan di rastiyê de cezayekî giran e û biryara vê yekê ji aliyê tu dadgehan ve nehatiye girtin û wiha pêde çû:
“Ev rewş vê tecrîdê dike awayê cezakirinê û neqanûnî ye.
Li Îmraliyê ji cezayê dadgehê wêdetir cezayekî neqanûnî ku bi awayekî eşkere tê kirin, heye.
Li gorî hiqûqa navneteweyî ev rewş bi temamî derqanûnî û îllegal e.”
Parêzer Jan Fermon: Lêgerîna rêyên din erka me hemûyan e
Parêzer Jan Fermon bal kişand ser helwesta CPT’ê ya li hemberî tecrîda Îmraliyê û got:
”CPT di çarçoveya hin qanûnên navxweyî de dixebite.
Ji ber vê yekê CPT qanûnên xwe disepîne.
Lê belê ji bo ragihandina rewşa Abdullah Ocalan lêgerîna rê û rêbazan û derfetan erka me hemûyan e.”
Rojên ‘Diyaloga bi Ocalan re’ di navbera 15-22’ê Hezîranê de ye
