Vîrûsa corona li beşên din ên Kurdistanê jî belav dibe. Li Başûrê Kurdistanê 6 kesên din bi vîrûsê ketin û li Îranê jî 65 kesên din mirin. Li Bakurê Kurdistanê jî, Koordînasyona Herêmê ya Qeyrana ya covid 19 ji gel xwest ku li gorî tedbîran tevbigerin.
Vîrûsa Corona hîna jî li Başûrê Kurdistanê bi dawî nebûye û rojane rewşên nû tên tomarkirin.
Li gorî daxuyaniya Wezareta Tenduristiyê ya Herêma Başûrê Kurdistanê, li navçeya Soran a girêdayî bajarê Hewlêrê 6 kesên din bi vîrûsa coronayê ketine.
bi vê yekê re heta niha li Herêma Başûrê Kurdistanê jimara kesên bi Coronayê ketine, gihişt 387 kesan.
Ji wan 5 kes mirine û 327 kes jî baş bûne.
Her wiha 55 kesên bi vîrûsê jî di bin çavdêriyê de ne.
“Asayîkirin mirinan, talûke ye”
Li Tirkiye û Bakurê Kurdistanê jî hîna vîrûs belav dibe.
Li gorî agahiyên desthilatdariyê ku daneyên rast vedişêre, heta niha 122 hezar û 392 kes bi vîrûsê ketine û 3 hezar û 258 kesan jî jiyana xwe ji dest dane.
Koordînasyona Herêmê ya Qeyrana Covît-19 rapora heftane parve kir, ji gel xwest ku li gorî tedbîrên li dijî vîrûsê tevbigerin û wiha got:
Mirinên rojane û hêjmara nexweşan dikin wekî tiştekî asayî.
Ev nêzîkatiyek pir talûke ye.
Jiyana mirovekî ji bo me pir bi qîmet e û di hemû mirinan de berpirsiyariya AKP’ê heye.
Girtiyên nexweş nayên berdan
Di vê rewşa metirsîdar a belavbûna vîrûsê de, girtiyên li Tirkiyê û bi taybet ên nexweş, di talûkeyê de ne.
Înîsiyatîfa Ji Girtiyên Nexweş Re Azadî bal kişand ser rewşa 14 girtiyên nexweş ên li gel ku rapora wan a “nikarin di girtîgehê de bimînin” hene jî, nayên berdan û xwest demildest werin berdan.
Xizmên girtiyên nexweş, li ser rewşa xizmên xwe bi fikar in
Bi qanûna înfazê ya nû re bi hezaran girtiyên edlî hatin berdan, lê bi deh hezaran girtiyên siyasî di girtîgehan de hatin hiştin.
Yek ji van girtiyan jî Hasan Aşa yê 55 salî ye ku di Girtîgeha Jimare 4 a Tîpa T a Amedê ye.
Aşa, 6 sal in girtiye, bi îdiaya “endamtiya rêxistinê” û “propagandaya rêxistinê” 13 sal û 6 meh ecza lê hatiye birînin û nexweş e.
Hevjîna wî Aynûr Aşa, diyar kir ku meh û nîveke wê hevdîtin li gel hevjînê xwe nekiriye û ji ber belavbûna vîrûsê, ew li ser rewşa wî bi fikar e.
Li îranê 65 kesên din li qurbaniyên vîrûsê zêde bûn
Li Îranê jî hîna rewş giran û rojane bi dehan kes jiyana xwe ji dest didin.
Li gorî daneyên fermî, di nava 24 saetên borî de 802 kes bi coronayê ketine û 65 kesan jî jiyana xwe jidest dane.
Li gorî vê hejmara kesên li Îranê bi coronayê ketine, gihîşt 96 hezar û 448 kesan.
Her wiha hejmara kesên mirine jî bû 6 hezar û 156 kes.
