Ukrayna di dîroka xwe de, ewqas çekên cuda û ji welatên cuda li gel xwe ne dîtiye.
Di demekî ku şerê li gel Rûsya derbasî meha 9’an bûyî de, welatên Rojava çekên nû bo Ukrayna dişînin.
Amerîka wê li dijî balafirên bêmirov yên Rûsya çekên parastinê yên HAWK bo Ukrayna bişîne.
Îran jî dibêje me di dema şer de çek ne firotine Rûsya, yên hatine firotin jî yên beriya şerê navbera Kîev û Moskowê ne.
Êdî şerê li Ukrayna derbasî meha xwe ya 9’an bû.
Di demekî ku Rûsya ji hevalbendên xwe yên rojhilat hewil dide piştevaniya bigre, welatên Rojava li ser alîkariya bo Ukrayna hemfikrin.
Li gorî ajansa Reutersê ku nûçeya xwe spartî berpirsekî payebilind ê rêveberiya Amerîkayê, rêveberiya Serok Joe Biden piştî sîstema parastinê ya biçûk û dûrbilind a Stinger, niha planên şandina sîstema parastinê ya HAWK dike.
Ev çek cara dawî di dema şerê Vîetnamê de hatin bikaranîn.
Hêzên Amerîka piştre ev yek bi teknolojiya nûjenre dan guhertin.
Ev yek li ser bingeha desthilatdariya “Desthilata Vekêşana Serokatiyê” (PDA), bo rewşên awarte û taybetî yên Amerîka hatibû çêkirin.
PDA destûr dide ku çek û cebilxaneyên di depoyan de bê ku erêkirina Kongresê pêwist bike, bi daxwaza serokê welat bo welatekî din were dayîn.
Reutersê diyar kir ku heman çavkaniyê eşkere nekir ku wê çend sîstem û mûşekên HAWK bên şandin.
Herwiha Koşka Spî jî pirsa derbarê mijarê de bêbersiv hişt.
Sîstema parastinê ya HAWK wekî qonaxa berê ya sîstema parastina mûşekî ya Patriot tê zanîn ku ji aliyê Raytheon Technologies ve hatiye çêkirin.
Biden piştî êrîşên mûşekî yên Rûsyayê di vê mehê de soz da ku wê pergala parastina hewayî ya pêşketî ji rêveberiya Ukraynayê re bişîne.
NATO: Spanya wê 4 pergalên HAWK bişîne Ukrayna
Sekreterê Giştî yê NATO’yê Jens Stoltenberg ragihand ku Spanya jî plan dike ku 4 pergalên HAWK’ê bişîne.
Piştî êrîşa Rûsyayê di 24ê Sibatê de li ser Ukrayna despê kir û heta niha Amerîka bi bihayê 17,6 mîlyar dolar çek û cebilxane şandiye Ukraynayê.
Amerîka: Encamên bikaranîna çekên kîmawî wê giran be
Li aliyekî din, rêveberiya Waşîngton di her fersendê de Moskow li ser gefên karanîna çekên nukleerî hişyar dike.
Berdevkê Wezareta Derve ya Amerîkayê Ned Price di daxuyaniya çapemeniya rojane de got:
Eger Rûsya çekên nukleerî li Ukraynayê bikar bîne, wê berdêla wê giran be.
Îran: Di dema şer de me ti çek nefirotine Rûsya
Piştî êrişa Rûsya ya bi dronan li ser Kîevê, Îran bû armanca bertekên rojavayî yan.
Li ser vê yekê Wezarê Karê Derve ya Îranê Huseyîn Emîr Ebdulahiyan got:
Di dema şerê navbera Rûsya û Ukraynayê de me ti çek ne dane Moskow.
Eger were piştrastkirin ku Rûsya di êrişa li ser Ukraynayê de çekên me bikar aniye em ê teqez li hemberî vê bêdeng nemînin.
