Êirşên dagirkeriya Tirkiyê bi daxuyaniyên cuda li seranserî herêmê hatin şermezarkirin.
Hate gotin: “Em ê qet lawaz nebin, em ê destketiyên zarokên xwe biparêzin û xeyalên mêtingeriyê bi hevgirtina xwe hilweşînin.”
Li Qamişlo û Hesekê jî 15 sazî, yekîtî û malbendên rewşenbîrî, civakî, olî û wêjeyî yên Kurd, Ereb, Asûr, Suryan û Ermen bi daxuyaniyeke hevbeş êriş şermezar kirin û wiha gotin:
“Armanca dagirkeriya Tirkiyê ew e jihevxistin û têkbirina projeya netewa demokratîk e ya ku li vir tê jiyîn.
Em jî soz didin şehîdên xwe ku em ê heta dawiyê vê projeyê û tevahî destketiyan biparêzin.”
Meclisa Civaka Ermenî jî wiha anî ziman:
“Dîroka Tirkiyê tijî komkujî û teror e, ev êrişên ku niha li dijî herêmê tê kirin ji komkujiya li dijî Ermenan ne qut e.”
Dîsa li Hesekê şênî kom bûn û êriş bi tundî şermezar kirin.
Şêniyan diyar kirin ku êrişên tersonek ên dewleta Tirk dê tu carî wan lawaz neke û dê heta dawiyê li dijî van êrişan li ber xwe bidin.
Desteya Xwecihî ya kantona Firatê jî da zanîn ku ev êriş berdewamiya kiryarên hevalbendê wê DAIŞ’ê ye û got:
“Me çawa DAIŞ bi temamî têk bir, em ê armancên van êrişan jî vala derxin.”
Li Minbicê jî Kombûna Jinên Zenûbiya daxuyanî da û got:
“Em ê bi her awayî li ber xwe bidin û rê nedin dagirkeriyeke nû.”
Di daxuyaniyên li Tebqa û Helebê hatin dayîn de jî hate gotin,
“Em van xeyalan têk bibin û xaka xwe ji her cure êrişan biparêzin.”
