Ev çend rojin di serî de Efxanîstan, Pakîstan, Endonezya, Tanzanya lêhî û barana zêde heye.
Ji ber vê kareseta xwezayî li Pakistanê hejmara miriyan derket 55’an û li Endonezyayê jî ji ber şemîtina axê 20 kes mirin.
Rayedarên wan welatan ragihandin ku ji bo rizgarkirina kesan xebatên xwe didomînin.
Hat ragihandin ku hejmara kesên di 3 rojên dawîn de li parêzgehên başûrê rojavayê Pakistanê di encama barana zêde û birûskê de jiyana xwe ji dest dan derket 55’an.
Rayedaran agahî parve kirin ku piraniya kesên jiyana xwe ji dest dane cotkarên ku di dema çinîna genim de birûskê lê ketiye.
Serokwezîr Şehbaz Şerîf diyar kir ku wî telîmat daye rayedaran ku alîkariyên lezgîn bigihînin herêmên ku ji ber baranê bandor bûne.
Di lehiya ku ji ber baranê derket de gelek xanî xera bûn, li binesaziyê jî zirareke mezin çêbû.
Li Pakîstanê di lehiya ku sala 2022’an de ji sê parên welat di bin avê de mabû, nêzî 2 hezar kesî jiyana xwe ji dest dan û nêzî 30 milyar dolar zirar çêbû.
Şemîtina axê ya li Endonezyayê: 20 kes mirin
Li herêma Tana Toraja ya eyaleta Sûlawesî ya Başûrê Endonezyayê ji ber barana zêde ya êvara Şemiyê li du gundan ax şemîtî.
Piştî ku cenazeyên dayikeke 43 salî û zaroka wê ya 3 salî hatin dîtin, rayedaran diyar kirin ku hejmara qurbaniyan bûye 20 kes.
Ji tîma rizgarkirinê ya herêmê Mexîanûs Bekabel (meksiyanus bekabel) daxuyaniyek da çapemeniyê û got,
“Tîma lêgerîn û rizgarkirinê qurbanî li cihekî ne dûrî hev dîtin. Yek ji qurbaniyan dayik bû, yek jî zarok bû.”
Bekabel anî ziman ku piştî dîtina du qurbaniyan karê lêgerîn û rizgarkirinê bi dawî bû.
Li Girava Sumatra ya Endonezyayê meha borî di lehî û şimitîna axê de herî kêm 26 kesan jiyana xwe ji dest dan û ji ber barana zêde bi sedan xanî hilweşiyan û bi hezaran kes jî koçber bûn.
