Li Sûdanê di navbera yekîneyêna artêşê û Hêzên Piştevaniya Lezgîn de, şerekî giran qewimî. Di şer de herî kêm 56 sivîl mirin û derdora 600 kesî jî birîndar bûn.
Ev 2 roj in li Sûdanê şerekî giran li ser desthilatdariya welêt diqewime.
Her du aliyên şer jî, hevalbendên berê, Artêşa Sûdanê û Hêzên Piştevaniya Lezgîn in.
Li gorî daneyan di vî şerî de heta niha 56 kes hatine kuştin û bêhtirî 600 kesî jî birîndar bûne.
Hêzên Piştevaniya Lezgîn diyar kir ku wan Koşka Serokkomarîyê, balafirgeha Hartûmê û hin avahiyên girîng bi dest xistine.
Artêşa Sûdanê jî da xuyakirin ku ev agahî rast nînin û piştrast kir ku Hêzên Piştevaniya Lezgîn, yek jê balafira Saûdî Aîrlînes, 2 balafirên sivîl şewitandine.
Artêşa Sûdanê: me navendên hêzên piştevaniya lezgîn li 7 eyaletan kontrol kirin
Artêşê îro danê sibehê ragihand ku wan navendên Hêzên Piştevaniya Lezgîn ên li 7 eyaletan, kontrol kirine.
Ji bo rawestandina şerê li welêt, NY, Washîngton, Moskow, Parîs, Roma, Riyad,Yekîtiya Ereb û Yekîtiya Ewropayê banga agirbestê kir, lê belê bersiv ji van bangan re nehat dayîn.
General Abdulfettah El-Bûrhan ku bi darbeyê bû Serokê dewletê ragihand, ku serê sibehê li hemberî baregeha wî êrîşek hat kirin.
Fermandarê Hêzên Piştevaniya Lezgîn Hemedtî û general El-Bûrhan, ji bo sivîlan ji desthilatdariyê dûr bixînin li hev nekirin.
Lê belê bi demê re Hemedtî li hemberî darbeyê dengê xwe bilind kir û di danûstandinan de, xwe da aliyê sivîlan.
Li Misrê dengê ‘tolhildanê’ bilind dibe
Di vê navberê de, Hêzên Piştevaniya Lezgîn, leşkerên Misirî ku bi hêzên hewayî yên Sûdanê re tevlî tetbîqatê bûbûn, dîl girtin.
Hêzên Piştevaniya Lezgîn ragihand ku leşkerên Misirî dagirker in.
Piştre general Hemedtî ragihand ku leşkerên Misrî nehatine girtin û derketina hin dîmenan li ser medya dîjîtal cihê xemgîniyê ye.
Di dîmen de tê dîtin ku kiryarên xerab li leşkerên Misirê tên kirin.
Tê gotin, ev daxuyaniya Hemedtî, ji bo rêgirtina li ber tevlîbûna Misirê di şerê li Sûdanê de ye.
Di medya Misrê de jî, bang tê kirin ku bi rêya operasyoneke leşkerî, tola leşkerên Misirê bê hilanîn.
Ji bo rawestandina şerê li Sûdanê, duh Misirê û Erebistana Siûdî, banga civîneke awarte ya Komkara Erebî kiribû.
Hêzên Piştevaniya Lezgîn sala 2013 ji aliyê Serokê Sûdanê yê berê Umer El-Beşîr ve hatibû damezrandin.
