Desteya Rêveber a Federaliya Sûriyê teqîna li Cisir Şixor a li bejahiya Idlibê ku di encamê de sivîlan jiyana xwe ji dest da, şermezar kir û bang kir ku yekser kiryarên tundî û qetilkirinê li Sûriyê rawestînin.
Desteya Rêveber a Federaliya Sûriyê ya Rêxistinan û Desteyên Mafên Mirovan ku ji 96 rêxistin û desteyan pêk tê têkildarî teqîna li sûka gel a li Cisir Şixor a Sûriyê daxuyaniyek da.
Di daxuyaniyê de ev hate gotin:
Teqîna li Cisir Şixor teqîneke giran bû û zirarên wê belav bû.
Divê hemû kiryarên tundî, qetilkirin û xwînrijandina li kolanên Sûriyê, werin sekinandin.
Komîteyeke lêpirsînê ya serbixwe, yekalî, zelal bi beşdariya nûnerên ji Desteya Rêveber a Federaliya Sûriyê were avakirin ku hemû binpêkirinên li tevahî Sûriyê aşkera bikin.
Desteyê hemû kiryar şermezar kirin û bang li tevahî aliyên herêmê û navneteweyî kir ku ji bo pêşeroja herêmê bi erkên xwe rabin û çareyeke lezgîn ji krîza Sûriyê re bibînin.
Her weha diyar kir ku divê rêxistin û desteyên têkildarî parastina mafên mirovan li Sûriyê rêbazên ewle û aştiyane pêk bînin û ji bo yekitiya civaka Sûriyê û pêşerojeke demokrat bibin garantiyên rasteqîn.
