Bertekên navneteweyî li hember êrişa Îranê ya li ser Îsraîlê tund bûn.
Raya navneteweyî êrişa Îranê şermezarkirin û careke din piştgiriya xwe ya ji bo Îsraîlê û parastina wê ragihandin.
Di daxuyaniyan de êriş weke asteke nû ya “bêîstiqrariyê” li herêmê hat binavkirin û û ji bo pêşîgirtina aloziyê bang li her du aliyan hat kirin.
Êrişa Îranê ya bi zêdeyî 300 balefirên bêmirov û mûşekan li dijî Îsraîlê, li DYA û welatên Ewropayê rastî bertekên mezin hat.
Serokê Amerîkayê Joe Biden piştî êrişa Îranê bi ekîba xwe ya berpirsê ewlehiyê re civîneke awarte pêk anî.
Piştî civînê Joe Biden, êriş bi “bêaqilî” bi nav kir û soz da ku piştgiriyê bide Îsraîlê.
Şêwirmendê Almanyayê Olaf Scholz jî êrîş bi tundî şermezar kir û got:
“Bi vê êrîşa bêberpirsiyarî û bi ti awayî ne rewa, Îran xist nava metirsiya şerekî herêmî.”
Di daxuyaniya ku ji aliyê Berdevkê Scholz Steffen Hebestreit (Stefin Hebestrayt) ve hat dayîn de hat gotin ku Almanya li cem Îsraîlê ye.
Wezîra Derve ya Almanyayê Annalena Baerbock jî di daxuyaniya xwe ya li ser mijarê de diyar kir ku ew li aliyê Îsraîlê ne û û bang li Îran û alîgirên wê kir da ku dawî li êrişan bînîn.
Êrişa Îranê ya li dijî Îsraîlê ji hêla Fransayê ve jî hat şermezarkirin.
Fransa êrişê weke asteke nû ya “bêîstiqrariyê” li herêmê bi nav ki û got:
“Xeteriya zêdebûna rageşiya leşkerî heye”.
Têkildarî mijarê Serokwezîrê Îngilîstanê Rishi Sunak jî daxuyaniyek da û wiha got:
“Îranê careke din nîşan da ku dixwaze kaosê li hewşa xwe biçîne”
Rishi Sunak destnîşan kir ku ew ê ewlehiya Îsraîlê biparêzin.
Her wiha ji aliyê Netewên Yekbûyî, Yekitiya Ewropa, Konseya Ewropa û Natoyê ve jî li dijî êrişa Îranê û alîgirên wê bertekên tund hatin nîşandan.
Di bertekan de êriş weke metirsiyek cidî hat binavkirin û ji bo pêşîgirtina zêdebûna aloziyên herêmî, bang li her du aliyan hat kirin.
Her wiha Wezareta Derve ya Rûsyayê jî fikara xwe ya derbarê mijarê de anî ziman û destnîşan kir ku Îranê piştî êrişa li dijî nûnertiya xwe ya li Şamê, mafê xwe yê parastinê li gorî xala 51’emîn a Peymana Neteweyên Yekbûyî bi kar anî.
Erebistana Siûdî jî bang li Konseya Ewlekariyê ya Neteweyên Yekbûyî kir ku “berpirsiyariya xwe ya parastina aştî û ewlehiya navneteweyî bi cih bîne”.
Amerîka ji bo kêmkirina Ragêşiya Îsraîl û Îranê hevdîtinan pêk tîne
