Li Sudanê rageşî didomin.
Herî dawî qebileyek ji Sûdanê tevlî vê rageşiyê bû ku rayedarekî payebilind ê berê yê Rêxistina Ewlekarî û Îstixbaratê ya Sûdanê bûbû sedema aloziyan.
Serokê qebîleya Mehamîd li herêma Darfûrê li rojavayê Sûdanê, Mûsa Hîlal ragihandibû ku ew di şerê li dijî Hêzên Piştgiriya Bilez de bi artêşa Sûdanê re di nava tifaqekî baş de ne.
Daxuyaniyên rayedarekî payebilind ê berê yê Rêxistina Ewlekarî û Îstixbaratê ya Sûdanê bû sedema alozî û rageşiya qebileyan li rojhilatê welêt.
Ev yek bû sedem ku hêzên siyasî û sivîl alîgirên rejîma berê bi alozkirina rewşa herêma rojhilat bi sedema şerê berdewam li welat tawanbar bikin û daxuyaniyên navborî wek ‘nîjadperestî û tehrîkkirina axaftinên nefretê’ bi nav kirin.
Piştî van daxuyaniyan, ciwanên qebîleyan Port Sûdan û Kassala civînên gel li dar xistin û daxwaz kirin ku berpirsê ewlehiyê ji ber gotinên wî yên ku pirsa gîrdana wan a Sûdanê dike, bi awayekî qanûnî berpirsiyar bê dîtin.
Piştî bûyereke bi heman rengî ku beriya niha jî qewimî, Fermandehiya Artêşa Sûdanê ragihand ku derbarê bûyerê de lêpirsîn dane destpêkirin, lê heta niha encam nehatine ragihandin.
Serokê encumena hişyarbûnan şoreşger tevlî artêşa Sudanê bû
Serokê Encumena Hişyarbûna Şoreşgeran û serokê qebîleya Mehamîd li herêma Darfûrê li rojavayê Sûdanê, Mûsa Hîlal ragihandibû ku ew di şerê li dijî Hêzên Piştgiriya Bilez de bi artêşa Sûdanê re di nava tifaqekî baş de ne.
Musa Hîlal di axaftina xwe ya ji bo girseya eşîra Mehamîdan ku mezintirîn qebîle ye wiha got:
“Nabe ku welatiyê baş welatê xwe wêran bike an qebûl bike.
Em bi vê yekê radigihînin ku em li aliyê dewlet, welat û saziyên wê yên serwer in û cihê me ne aliyê ti milîsan e, em radigihînin ku em li gel artêşa Sûdanê ne.”
Îmarat îdiayên bê îstiqrarkirina Sudanê red dike
Li aliyê din Îmarat di nameya ku ji Konseya Ewlekariyê ya Neteweyên Yekbûyî re şand de, diyar kir ku ew daxuyaniyên Nûnerê Daîmî yê Sûdanê yê li Neteweyên Yekbûyî bi awayekî cidî red dikin û ev ‘îdiayên bêbingeh’ in.
Sûdanê bang li Konseya Ewlekariyê ya Neteweyên Yekbûyî kir ku bi fermî Îmaratê şermezar bike û dayîna alavên şer û fînansekirina Hêzên Piştgiriya Bilez rawestîne.
Sûdanê di 29’ê Adarê de giliyê Îmaratê li Konseya Ewlekariyê ya Neteweyên Yekbûyî kir, û Îmarat sûcdar kir ku ew plan dike ku şer gurr bike û bi alîkariya Çadê piştgirî dide rêxistinê.
Di nameya xwe ya ji bo Konseya Ewlekariyê ya Neteweyên Yekbûyî de, Îmarat diyar kir ku “ew bi biryar e ku piştgiriyê bide çareseriya aştiyane ya pevçûna li Sûdanê û dê bi hemû aliyên têkildar re xebatên xwe bidomîne.
Armanc ew e ku Sûdanê bixe ser rêya siyasî ji bo bidestxistina çareseriyeke mayînde û ji bo avakirina hikûmeteke sivîl lihevhatineke neteweyî.”
