Nêçîrvan Barzanî ev sê rojin li Tehranê bi rayedarên Îranê re hevdîtinan pêk tîne.
Îranê hişyarî da ku li Hewlerê baregehên Îsraîlê hene û divê yên heyî ji wir bên derxistin.
Her wiha rayedarên Îranê balkişandin li ser hêzên Rojhilatî û diyar kirin ku wê Îran êrişên xwe yên li dijî wan hêzan bidomîne.
Serokê demborî yê Başûrê Kurdistanê Nêçîrvan Barzanî ev sê rojin li Tehranê ye.
Nêçîrvan bi rayedarên Îranê re li ser mijarên siyasî û ewlehiyê herwiha paşxistina hilbijartinên Parlamentoya Başûrê Kurdistanê hevdîtinan pêk tîne.
Rayedarên Îranê bi rêya Nêçîrvan Barzanî hişyarî da Başûrê Kurdistanê.
Li gorî hin nûçeyên çapemeniya Îranê, rayedarên Îranê îqna bûne ku baregehên Îsraîlê li Hewlêrê hene.
Rayedarên Îranê têkildarî vê mijarê belge û delîl pêşkêşî Nêçîrvan Barzanî kirine.
Her wiha li gor çapemeniya Îranê, rayedarên Îranê jî ji Nêçîrvan Barzanî re gotine, Îran rê nade tu baregehên Îsraîlê li Başûrê Kurdistanê hebin û divê yên ku niha li Başûrê Kurdistanê hene jî bên derxistin.
Rayedarên Îranê jî tekezî li ser têkeliyên baş û bihêz li gel Başûrê Kurdistanê kirin û soza hevkarî û piştevaniya ji bo çareserkirina pirsgirêkên di navbera Hewlêr û Bexdayê de dan.
Îran êrîşên xwe li dijî hêzên Rojhilatî bidomînin
Beşek din ya hişyariyên rayedarên Îranê ji bo Nêçîrvan Barzanî, mijara hêzên Rojhilatê Kurdistanê bû.
Di vê çarçoveyê de rayedarên ewlehiyê yên Îranê gavên Başûrê Kurdistanê ji bo bêçekirina beşek ji hêzên Rojhilatî bilind nirxand.
Lewra hişyarî da ku nabe tu liv û tevgerên hêzên muxalefetê li ser sînor bimînin, berovajiyê vê yekê wê Îran êrişên xwe yên li dijî wan bidomîne.
Serokê demborî yê Başûrê Kurdistanê Nêçîrvan Barzanî di civîneke çapemeniyê de li Tehranê ev yek piştrast kir ku wan di hevdîtinan de fikarên ewlehiyê yên Îranê gotûbêj kirin û got:
“Herêma Kurdistanê rê nade tu hêzek ji bo Îranê bibe metirsî.
Li cîhanê tu hêzek ku bikeve welatekî ku çalakiyên çekdarî pêk bîne û paşî vegere welatekî din, em ji vê yekê ne razî ne.
Di warê ewlehiyê de gelek karên baş hatine kirin, lê ji bo çareser kirina fikaran bi tevahî xebatek heye ku were kirin.”
Nêçîrvan: Li ser ewlehiya Îranê bi fikar in
Her çendî ku derbarê fikarên Îranê yên derbarê hebûna baregehên Îsraîlê li Başûrê Kurdistanê pirsiyar ji Nêçîrvan Barzanî kirin, lê bersiva van pirsan neda.
Nêçîrvan Barzanî di civînên çapemeniyê de yên li Tehranê de çendîn car tekezî li ser fikarên ewlehiyê yên Îranê kir û got:
“Em jî wek Herêma Kurdistanê ji vê rewşê bifikarin.
Lê me li hev kir ku em pirsgirêkên xwe bi rêya diyalogê çareser bikin.”
