Neteweyên Yekbûyî derbarê kuştina sivîlan a li seranserî cîhanê de raporekî parve kir.
Li gorî raporê li seranserî cîhanê sala 2023’yan di şer û pevçûnan de mirina sivîlan li gor sala borî ji sedî 72 zêde bûye.
Her wiha Neteweyên Yekbûyî sala borî mirina 33 hezar sivîlan tomar kir.
Alîkara Sekreterê Giştî yê Neteweyên Yekbûyî (NY) ji Karûbarên Mirovî û Alîkara Koordînatora Alîkariya Lezgîn Joyce Msuya derbarê mirina sivîlan de rapora bîlançoya salane parve kir.
Joyce Msuya diyar kir ku li seranserî cîhanê sala 2023’yan di şer û pevçûnan de mirina sivîlan li gor sala borî ji sedî 72 zêde bû.
Msuya bi bîr xist ku 25 sal di ser biryara Konseya Ewelekariyê ya Neteweyên Yekbûyî ya parastina sivîlan derbas bû.
Msuya bal kişand ku sala 2023’yan di warê parastina sivîlên di pevçûnan de saleke xerab e û da zanîn ku di encama êrîşa 7’ê Cotmehê ya Hemasê û êrîşên Îsraîlê de mirin, wêranî û êşeke nedîtî çêbû.
Joyce Msuya anî ziman ku ji sedî 75’ê xelkê Xezayê bi darê zorê koçber bûne û diyar kir ku xelaya ku bi destê mirov pêk hatiye li ber derî ye.
NY sala borî mirina 33 hezar sivîlan tomar kir
Msuya bi bîr xist ku di sala 2023’yan de li Sûdanê şereke hovane derketibû û bi deh hezaran sivîl hatin kuştin û bi hezaran jî birîndar bûn.
Msuya ji aliyê din ve bal kişand ser bandora şer û pevçûnên ku li Komara Demokratîk a Kongo, Myanmar, Nîjerya, Sahel, Somalî, Sûriyê û Ukraynayê li ser sivîlan berdewam dikin û got:
“Neteweyên Yekbûyî sala borî mirina 33 hezar sivîlan tomar kir.
Em difikirin ku kesên hatine kuştin ji reqema tê tomarkirin zêdetir e.
Ev yek li gor sala borî ji sedî 72 zêde bûye.”
Msuya bal kişand ser wê yekê ku bikaranîna çekên teqemenî bandoreke xirab li ser sivîlan dike û destnîşan kir ku sedema sereke ya mirina sivîlan li Sûdan û Ukraynayê bikaranîna van çekan e.
“Li gorî hemû pevçûnan, dema ku çekên teqemenî li deverên qelebalix tên bikaranîn, ji sedî 90ê kesên hatine kuştin sivîl in,”
Di sala 2023’yan de 110 milyon mirov ji cih û warên xwe bûn
Msuya bal kişand ser jicîhûwarkirina bi darê zorê ya di pevçûnan de, destnîşan kir ku heta nîvê sala 2023’an 110 milyon kes ji ber pevçûn, zext, tundî û binpêkirinên mafên mirovan wê ji cih û warên xwe bibin.
Msuya diyar kir ku ji ber pevçûnan birçîbûn jî derketiye holê û li 19 herêmên pevçûnan 117 milyon kes bi bêewlehiya xwarinê ya di asta krîzê de têdikoşin.
Msuya bal kişand ser wê yekê ku di sala 2023’yan de zirara sivîlan di asteke metirsîdar de ye û hiqûqa mirovî ya navneteweyî û yasayên mafên mirovan ên navneteweyî nayên cîbicîkirin.
Joyce Msuya got:
“Divê em hewildanên xwe ducar bikin da ku aliyên şer erkên xwe bi cih bînin.
Di vê çarçoveyê de divê em serxwebûn û bêalîbûna Dadgeha Cezayê ya Navneteweyî biparêzin.”
