Tevgerên Rûsya li nava xaka Ûkrayna careke din welatên rojava xistiye nava fikaran. Rûsya ragihand ku ew ê çalakiyên xwe yên leşkerî yên li nêzî Kîevê kêm bike. Li ser vê yekê Ûkrayna û Amerîka bifikarin. Gelo Moskow vedikişe, yan ji bo xwe komî serhev bike ji hinke herêman vedikişe. Serokomarê Ûkrayna Zelensky dibêje di danûstandinan de hêvî xuya dikin. Serokê DYA Biden got, Ev nepavekişîne, ev yek ji nûve cihgirtin e. Di vê navberê de Hollanda cezayên nû li dijî Rûsya ferz kir.
Piştî hevdîtinên roja doh yên navbera şandeya Ûkrayna û Rûsyayê li Stenbolê, ji Moskow daxuyaniyên balkêş hatin.
Rûsya îdia dike ku wê çalakiyên xwe yên li derdora Kîev û Çernihivê kêm bikin.
Serokomarê Ûkraynayê Volodymyr Zelensky got, sînyalên ji hevdîtinên li Stenbolê “teqînên topên Rûsyayê nafetisînin”.
Li aliyê din Wezareta Parastinê ya DYA’yê daxuyaniya Rûsyayê weke “manewrayeke taktîkî” nirxand û jjibo operasyonên nû yên leşkerî yên li herêmên din hişyarî da.
Ûkrayna: Dijmin hîna li herêma me ye
Serfermandariya Giştî ya Ukraynayê got, ew bawer dikin ku vekişîn “dibe ku manewrayek leşkeran be”.
Zelensky jî bi domdarî wiha got:
“Parastina Ûkraynayê peywira me ya sereke ye, her tiştê din ji vê yekê tê.
Dijmin hê jî li herêma me maye.
Dorpêçkirin û bombebarankirina bajarên Ûkraynayê dewam dikin û hêzên leşkerî yên me tenê garantiya rizgariya me ne. Ûkraynî nebêhişin.”
Biden: Ez bi gotinên heyî zêde bawer nakim
DYA jî bi baldarî nêzî daxuyaniyên Rûsyayê bû.
Serokê Amerîkayê Joe Biden diyar kir ku ew hê ji daxuyaniyên Rûsyayê qane nebûne û got,
“Em ê bibînin. Heta ez gavên ku ew ê bavêjin nebînim, ez zêde girîngiyê nadim vê.”
Pentagon: Ev ne paşvekişîn e, ji nûve cihgirtin e
Berdevkê Wezareta Parastinê ya Amerîkayê John Kirby got, jimara leşkerên Rûsyayê yên ku heta niha ji paytexta Ûkraynayê Kîevê dûr ketine gelekî kêm e û ew amade ne bawer bikin ku ev “paşvekişîn” e.
Kirby destnîşan kir ku mimkun e leşker vekişin da ku li deverên din ên Ûkraynayê bi cih bibin û ev tişt anî ziman,
“Em difikirin ku ev vegerandin e, ne vekişîn.
Divê ji bo êrişên ku wê li deverên cuda pêk werin, hişyar bin.
Kirby da zanîn ku Rûsya dikare ji dûr ve bi mûşekan lêdana Kîevê bidomîne û diyar kir ku metirsiya li Kîevê bi dawî nebûye.
Pisporên leşkerî li Brîtanyayê gotin, “egeriyek zêde heye” ku Rûsya hêza xwe ya leşkerî ji bakur veguhezîne başûrê rojhilatê welêt.
Piştî hevdîtinên duh li Stenbolê hatin kirin, ji Rûsyayê peyamên erênî hatin.
Wezareta Parastinê ya Rûsyayê diyar kir ku ew dixwazin baweriyê pêk bîne û danûstandinan bidomîne.
Hollanda 17 dîplomatên Rûsya dersînor kir
Wezîrê Karên Derve yê Hollandayê Wopke Hoekstra li ser hesabê xwe yê medyaya civakî ragihand ku wan dîplomatên Rûs ji ber sîxurtiyê dersînor kirine.
Hoekstra got: “Hollanda 17 efserên îstixbarata Rûsya ku weke dîplomatan kardikirin ji balyozxaneyên Rûsî yên li Holendayê derxistin.”
