Li Moskowê, li derdora maseya civîna çaralî vê carê Wezîrên Karên Derve yên Rûsya, Tirkiye, Îran û hikumeta Şamê hebûn. Wezîran li ser xwîna Sûriyan careke din pîlanên xwe yên bazarê gerandin. Lê di daxuyaniyên cuda yên wezîran hatin dayîn de, têkçûna civînê derxist holê. Ji xwe têkildarî hevdîtina Erdogan û El Esed ya ev civîn bi armanca wê hatîn despêkirin jî, ti axaftin nehat kirin.
Lê diyar e di civînê de ti kesî li yê din guhdar nekiriye.
Ji ber ku tiştekî hevbeş di navera gotinên her çar wezîran de tunebû.
El Miqdad daxwaza derketina hêzên Tirkiye ji xaka Sûriyê dubare kir
Wezîrê Karê Derve yê hikumeta Şamê Feysel Miqdad, daxwaza derketina hêzên dewleta Tirk ji hemû xaka Sûriyê dubare kir.
Miqdad got: “Ji bo me ya herî girîng, bidawîkirina hemû şêweyên hebûna leşkerî li ser xaka Sûriyê ye.
Bêguman hêzên Tirkî jî, yek ji van hêzan e.
Eger pêşketin di vî warî de çênebe, em ê li cihê xwe bimînin û em nagihêjin ti encaman.
Em ji ser vê yekê venagerin.”
Lavrov: Civîn ji bo asankirina têkliyên Enqere-Şamê ye
Ji aliyê xwe ve Wezîrê Karê Derve yê Rûsyayê Sêrgy Lavrov da xuyakirin ku mebesta vê civînê danîna nexşerêyekê ji bo asakirina têkiliyên Şam û Enqerê ye.
Nayê veşartin ku Rûsya bi van civînan, ji bo destekê di hilbijartina 14’ê Gulanê de bide Erdogan, dixwaze desteka dewleta Tirk di şerê Ukraynayê de qezenc bike.
Lavrov daxwaza çalakirina rêyên veguhastin û yên lojestîk ên qutbûyî û destpêkirina hevkariya bazirganî û aborî, di navbera her du welatan de kir.
Wezîrê Rûs yê ev derfet berneda ku hin berjewendiyên welatê xwe jî bîne zimên, hebûna hêzên Amerîkî li Sûriyê şermezar kir.
Ji xwe wezîrê dewleta Tirk mîna ku ne di civînê de bû, ti bersiv neda daxwazên her du hempîşeyên xwe.
Mevlût Çavişolû piştî civînê li ser hesabê xwe yê Twîtterê got:
“Di civînê de me teqezî li ser vegera penaberan, pêvajoya siyasî li Sûriyê û parastina xaka wê kir.”
Hebûna Îranê weke hevalbendê herî xurt ê hikumeta Şamê, di civînê de tiştekî normal e..
Lê rewşa hindirîn a Îranê, her wiha asankirina têkiliyan bi Erebistana Siûdî re, dihêle Tehran bi baldarî nêzî mijara Sûrî dibe.
