Gelê Îsraîlê li dijî vê biryara reforma gelekî bi hêrsin.
Lê tevî hemû nerazîbûnan jî Netanhayu ji ya xwe nayê xarê.
Lewma yek ji qanûnên sereke yên planê hat derxistin.
Piştî vê biryarê bi hezaran kes daketin qadan.
Serokwezîrê Îsraîlê Benjamin Netanyahu dibêje “divê Dadgeha Bilind destwerdan li biryarên hikumetê neke”.
Ev daxwaza Netanyahu ya weke pêşnûmeyekê pêşkêşî meclisê hat kirin, rewşa li welat aloz kiriye.
Beşeke zêde ji welatiyan pêngava reformê weke têkbirina demokrasî û lawazkirina dadweriyê dibînin.
Dihate payînê ku di meclîsê de di navbera hikumet û muxalîfan de li hevkirin çê bibe.
Lê hewldanên navbeynkariyê ji ber nakokiyan têk çûn.
Serokê Îsraîlê Ishaq Herzog nekarî lihevkirinekê di navbera hikumet û muxalîfan de çêbike.
Îsraîlî li dijî biryarê bi hêrsin
Zêdebûna nîqaşên di nava hikumet û muxalefetê de nîşan dide ku li Îsraîlê krîzeke siyasî û îdeolojîk li ber derî ye.
Piştî ku parlamenê beşeke girîng a reforma qebûl kir bi hezaran kes li Qudis û Tel Avîvê daketin kolanan.
Bijîşkan li dijî pilana reformê dest bi grevê kir
Her wiha li seranserê welêt bijîşkan biryara grevê dan.
Yekitiya Bijîşkên Îsraîlê ragihandin ku ew jî beşdarî grevê dibin û ji bilî rewşên awarte wê ti kareke din nekin.
10 hezar leşkerên yedek ên li Îsraîlê jî ragihandin ku ew ê li dijî biryara hikumeta Netanyahu ji erkê xwe îstifa bikin.
Li Îsraîlê bi hezaran kes daketin kolanan
Her wiha nêzîkî 20 hezar xwepêşander li dora avahiya parlamentoyê li Qudisê kom bûn û dest bi çalakiyan kirin.
Piştî ku encamên dengdanê di çapemeniyê de hatin weşandin, xwepêşanderan siloganên ‘Em ê ti carî serî netewînin’ gotin.
Her wiha di meşê de pankartên “Em ê xizmetê ji dîktatorekî re nekin”, “demokrasî an serhildan”, “Îsraîl ji Netanyahu rizgar bikin” hatin hildan.
Gelek kargeh û navendên danûstendinê jî ji bo piştgiriya xwepêşanderan deriyê xwe kilîd kirin.
Polîsan jî weke her car ji bo rawestandina çalakiyê êrişî xwepêşandêran kir.
Di çalakiyên hatine li darxistin de herî kêm 19 kes hatin binçavkirin.
Netanyahu di reformê de bi îsrare
Lê tevî hemû nerazîbûnan jî Netanyahu pêşnûmeqanûn wekî “tevgerek demokratîk a pêwîst” bi nav kir û got:
“Ew ê hevsengiyê di navbera saziyên dewletê de ava bike.”
