Geşedanên şerê Rûsya û Ukraynayê di aliyê danûstandinên dîplomasiyê de berdewam dike.
Wezîrê Parastinê yê Rûsyayê Sergey Şoygu anî ziman ku Amerîka pêşî pirsgirêka Ukraynayê afirand, niha jî bi zanebûn şer dirêj dike.
Her wiha Yewnanîstanê careke din daxwazên şandina S-300 ên Rûsyayê û pergalên parastina hewayî ya Patriot a Amerîkayê bo Ukraynayê red kir.
Wezîrê Parastinê yê Rûsyayê Sergey Şoygu di Civîna Wezîrên Parastinê yên Rêxistina Hevkariya Şanghayê ya ku li Astanaya paytextê Kazakistanê hat lidarxistin de axivî.
Şoygu, bal kişand ser şerê Rûsya û Ukrayna, têkildarî kiryarên Amerîkayê yên derbarê Ukraynayê de wiha got:
“Amerîka pêşî pirsgirêka Ukraynayê afirand, niha jî bi zanebûn şer dirêj dike.
Hêzên Çekdar ên Rûsyayê bi awayekî bi bandor operasyona leşkerî ya taybet li Ukraynayê didomînin.”
Şoygu da zanîn ku pisporên leşkerî yên rojavayî di plansazkirina çalakiyên sabotajê yên li Rûsyayê de cih digirin û anî ziman ku Ukraynayê çekên ku ji Rojava wergirtiye li dijî Rûsyayê bikar aniye.
Şoygu bi bîr xist ku meha borî li Moskovayê li salona konserê ya Crocus City Hall êrîşeke terorîstî pêk hat û destnîşan kir ku destê Ukraynayê di vê êrîşê de heye.
Yewnanistan: Pêdiviya me bi S-300 heye
Her wiha Yewnanîstanê careke din daxwazên şandina S-300 ên Rûsyayê û pergalên parastina hewayî ya Patriot a Amerîkayê bo Ukraynayê red kir.
Serokwezîrê Yewnanîstanê Kyriakos Mitsotakis di daxuyaniya xwe ya ji televîzyona Skaî re got:
“Em ê ne S-300 ne jî Patriotan bişînin.”
Mîtsotakis diyar kir ku Yewnanîstan niha ji bo piştgiriya Ukraynayê gelek alavên parastinê peyda dike, lê teqez kir ku Yewnanîstan nikare pergalên çekan ên ku ji bo wê girîng in peyda bike.
Di çapemeniyê de nûçe hatin belavkirin ku hin lîderên Yekîtiya Ewropayê zextê li Yewnanîstanê dikin ku pergalên parastina hewayî bişîne Ûkraynayê.
Di hevpeyvîna xwe ya bi televizyona Skai re, Mitsotakis diyar kir ku daxwazên di vî warî de ji wî re hatine ragihandin, lê wan xwestiye ku cûreyên din ên tiştên “zêde” bişînin Ukraynayê.
Gefên Tirkiyê li ser Yewnanîstanê
Li aliyê din hem Mîtsotakis hem jî rayedarên din ên Yewnanîstanê di daxuyaniyên xwe yên berê de peyam dabûn ku li hemberî gefên muxtemel ên Tirkiyê pêdiviya wan bi pergala parastina hewayî heye.
Her du welat di sala 2020’an de ji ber nakokiya li ser herêmên deryayî li Rojhilatê Deryaya Spî ketin ber pevçûnek germ.
Di dema ku Enqere û Atîna di van demên dawîn de ji bo normalkirina peywendiyan gav avêtin, plana Yewnanîstanê ya avakirina parkek deryayî li Deryaya Egeyê bi Tirkiyê re bû sedema aloziyê.
Mîtsotakis di daxuyaniyên xwe yên ji bo Skaiyê de jî bal kişand ser vê mijarê û diyar kir ku tevî bertekên Tirkiyê jî dê projeya parka deryayî pêk bînin.
Serokwezîrê Yewnanîstanê got:
“Em ê parka deryayê îlan bikin. Ji ber ku ev nayê wê wateyê ku em nikarin bi hev re biaxivin tenê ji ber ku cudahiyên me yên bi Tirkiyê re hene.”
