Duh Kongreya Berlînê ya ji bo çareseriya aloziya Lîbyayê bi encamnameyekê bi dawî bû. Di encamnameyê de hat gotin, teqez divê çek ji Lîbyayê re neyên şandin. Almanyayê ragihand ku wê destpêk meha Sibatê jî ji bo Lîbyayê kongreyek were lidarxistin.
Duh, bêyî amadebûna her du aliyên şer ên Lîbyayê, xebatên Kongreya Berlînê bi dawî bû.
Piştî bidawîbûna van xebatan encamnameya dawî hat eşkerekirin.
Di çend xalên sereke yên encamnameyê de wiha tê gotin:
– Şandina çekan ya ji bo Lîbya were qedexekirin û komîteyek were avakirin.
– Pêvajoya siyasî dest pê bike.
– Bi armanca pêkanîna agirbestê, ji herdu aliyên Lîbyayê komîteyeke leşkerî a ji 10 kesan were avakirin.
JOSEP BORRELL:
WÊ ZÊDE LI SER MIJARA QEDEXEKIRINA ŞANDINA ÇEKAN JI BO LÎBYAYÊ WERE RAWESTANDIN
Nûnerê Karûbarên Derve û siyaseta ewlehiyê ya Yekîtiya Eworpayê, Josep Borrell ragihand ku wê Yektîiya Ewropayê zêde li ser mijara qedexekirina şandina çekan ji bo Lîbyayê raweste.
WEZÎRÊ DERVE YÊ ALMANYAYÊ, HEIKO MAAS:
TÊ PAYÎN KU KONGREYA DIN A JI BO LÎBYAYÊ DI DESTPÊKA MEHA SIBATÊ DE PÊK WERE
Îro jî, Wezîrê Derve yê Almanyayê Heiko Maas, eşkere kir ku tê payîn kongreya din a ji bo Lîbyayê di destpêka meha sibatê de pêk were.
Heiko Maas destnîşan kir ku Kongreya Berlînê armancên xwe pêk anîn û wê di destpêka sibatê de jî li ser asta wezîrên derve yên dewletan kongreyek pêk were.
SEROKOMARÊ CEZAYÎRÊ EBDULMECÎD TEBÛN
RAGIHAND KU WELATÊ WÎ AMADE YE KU DIYALOGÊN LÎBÎ-LÎBÎ LI CEM XWE PÊK BÎNE
Li gorî Ajansa Nûçeyan a Cezayîrê jî, hat ragihandin ku serokomarê Cezayîrê Ebdulmecîd Tebûn di Kongreya Berlînê de ragihandiye ku welatê wî amade ye ku diyalogên Lîbî-Lîbî li cem xwe pêk bîne.
Ebdulmecîd Tebûn diyar kir ku welatê wî zêdeyî hezar KM bi Lîbyayê ve ye û divê xebateke hevbeş ji bo şerê li dijî terorê pêk were.
BALYOZXANEYA AMERÎKAYÊ YA LI LÎBYAYÊ
DUH Û ÎRO JÎ BI XELÎFE HEFTER Û FAYÎZ EL-SERAC RE HEVDÎTINÊN CUDA PÊK ANÎN
Balyozxaneya Amerîkayê ya li Lîbyayê, ragihand ku balyoz Richard Norland duh û îro jî bi serokê Artêşa Niştîmanî Xelîfe Hefter û serokê Hikûmeta Wîfaqê Fayîz El-Serac hevdîtinên cuda pêk anîn.
Balyozxaneya Amerîkî li ser hesabê xwe yê tiwîtterê destnîşan kir ku armanca hevdîtinan ew bû ku guh bidin nirxandinên aliyan ji bo Kongreya Belrînê.
Balyozxaneya Amerîkayê ya Li Lîbyayê diyar kir ku wê Amerîka xebeta xwe derbarê çareseriya li Lîbyayê bidomîne.
SEROKOMARÊ DEWLETA TIRK ERDOGAN
IDÎA KIR KU WELATÊ WÎ HEYA NIHA TI HÊZ JI BO LÎBYAYÊ NEŞANDINE
Serokomarê dewleta Tirk Erdogan, îro idîa kir ku welatê wî heya niha ti hêz ji bo Lîbyayê neşandine, lê hin leşker ji bo şêwirmendî û perwerdeya leşkerî hatine şandin.
Erdogan destnîşan kir ku gavên ku Tirkiyê di Lîbyayê avêtine hişte ku hevsengiyeke siyasî li welêt pêk were.
SEROKÊ HIKÛMETA WÎFAQÊ, EL-SERAC
DAXWAZA HEFTER YA PARVEKIRINA DEWLEMENDIYA LÎBYAYÊ RED KIR
Li aliyeke din ve jî, serokê Hikûmeta Wîfaqê El-Serac daxwaza Hefter ya parvekirina dewlemendiya Lîbya ji bo herdu aliyan red kir.
Her wiha El-Serac, anî ziman ku ger dorpêça hêzên Hefter li ser navendên petrolê bidome wê rewşa li Lîbyayê aloztir be.
Serokê Hikûmeta Wîfaqê El-Serac got:
Em ê rêzgirtinê ji agirbesta di Kongreya Berlînê hatî ragihandin bigirin.
Em bi danûstandinên siyasî re ne, lê careke din ez bi Hefter re necivim.
