Li Sûriyê ji ber xetimandina çareseriya siyasî, aloziya aborî jî zêde buye. Ji ber nakokî û bazariyên Rûsya û Amerîkayê aloziya Sûriyê jî çareser nabe. Di encamê de jî her roj gelê Sûriyê êşa vê yekê dikişîne.
Li Sûriyê şerê sar û germ û bi taybet di navbera Amerîka û Rûsya bi hevre dimeşin.
Di vê derbarê de rojnameya Şerq El-Ewset analîzek pêşkêş kir û wiha tîne ziman;
Rûsya naxwaze li gel Ewropa û Amerîka derbarê pêşeroja Sûriyê de têkeve danûstandinên cidî.
Wê danûstandinên xwe hiştin piştî hilbijartinên Amerîka, li bendê ye ku Amerîka hêzên xwe ji Sûriyê vekişîne.
Li ser erdê jî dixwaze li Idlibê hinek bazaran bi dewleta Tirk re bike.
Ew naxwaze şerekî gur li Idlibê dest pê bike, tenê dixwaze parastina baregeha Himîmîmê misoger bike.
Dixwaze hêzên hikûmeta Şamê herêmên başûrê rêya Heleb-Laziqiyê di navbera Idlibê û Hemayê de kontrol bike û rêya M4 a navdewletî bi serbestî ji bo bazirganiyê bixebitîne.
Beramberî wê dibe ku Rûsya rê bide ku Tirkiyê û çeteyên wê derbasî Minbicê û Til Rifetê bibin.
Ji bo ku Rûsya Amerîka li rojhilatê Firatê tengav bike, xwe nêzîkî Kurdan dike û ber bi Şamê ve dibe.
Ji aliyekî din ve jî eşîreyên herêmê li dijî hêzên Sûriya Demokratîk radike.
Rûsya dixwaze li dawiya ji Amerîka re bibêje hebûna te li Sûriyê ne rewa ye û derkeve.
Li aliyê din Amerîka û Ewropa bi her awayî dixwazin hikûmeta Şamê lawaz bikin û bê rewatî bihêlin ku di encamê de bandorê li hebûna Rûsiya li Sûriyê jî dike.
Cezayên aborî li ser hikûmeta Şamê giran kirin.
Ji Neteweyên Yekbûyî xwestin ku hilbijartinê serokatiya Sûriyê bi çavdêrî û serpereştiyeke navneteweyî de pêk werin.
Li rojhilatê firatê jî, ji bo rêgirtina li pêşiya Rûsya û Îranê hebûna xwe ya leşkerî xurt û zêde dike.
Li Idlibê jî piştgiriya Tirkiyê li hemberî Rûsya dike.
Ya herî girîng jî nahêle ku têkilî li gel hikûmeta Şamê werin normalkirin.
Ji ber vê yekê aloziya Sûriyê di navbera Rûsiya û Amerîka daliqandî maye.
