YPGʹê nasnameyên du şervanên xwe ku di êrîşa hewayî ya dewleta Tirk a dagirker a di 3’ê Kanûnê de li Amûdê pêk hat şehîd bûne, eşkere kir.
Navenda Ragihandinê ya Yekîneyên Parastina Gel (YPG) derbarê şehadeta 2 şervanên ku di êrişa ezmanî ya dewleta Tirk a li ser navçeya Amûdê de şehîd bûbûn, daxuyaniyek da..
Di daxuyaniyê de li ser bûyerê ev agahî hatin dayîn:
“Di 3’yê Kanûnê de li ser rêya Amûdê nêzî gundê Raya balafira keşfê ya dewleta Tirk a dagirker seyareyeke ku 2 hevrêyên me têde bûn, kir hedef.
Di encama êrişê de hevrêyên me Dilxwaz Agir û Hisên Mamed şehîd bûn.
Dewleta Tirk a dagirker di çarçoveya konsepta ku di serî de qirkirina gelê Kurd û gelên azadîxwaz a herêmê kiriye hedef, bi salan e êrişên cur bi cur li ser axa me pêk tîne. ”
YPG’ê li ser jiyana û têkoşîna herdu şehîdan de ev yek got:
“Hevrêyê me Dilxwaz Agir û Hisên Mamed ji deverên cûda ên xaka Kurdistanê bûn, li ser armanca azadîya gelê Bakur û Rojhilatê Sûriyê hatin gel hev û bûn têkoşerê gelê xwe.
Li hember gel û dîrokê xwe berpirsyar dîtin û ji bo azadîyê barê giran ê şoreşê girtin li ser milên xwe.
Her du hevrêyên me yên hêja ku mêrxasên gelên me ne, di jiyana xwe ya şoreşgertiyê de di her şert û mercê de ji her karî re amade bûn.
Erk û berpirsyartiyên xwe li hember gel û dîrokê bicîh anîn.”
Li gorî daxuyaniyê, nasnameya herdu şervanên şehîd wiha ne:
- Nasnav: Dilxwaz Agir
- Nav û Paşnav: Osman Mutlu
- Navê Dayikê: Salîha
- Navê Bav: Sekvan
- Cih û Dîroka Şehadetê: Amûdê, 3 Kanûn 2022
- Nav û Paşnav: Hisên Mamed
- Navê Dayikê: Necah
- Navê Bav: Elî
- Cih û Dîroka Şehadetê: Amûdê, 3 Kanûn 2022
