Serokê Fermandariya Giştî ya DYA Orgeneral Mark Milley têkildarî hebûna hêzên wan li Rojhilata Navîn nirxandkir. Milley diyar kir ku Rojhilata Navîn ji gelek aliyan ve ji bo wan girînge, lewma ew ji vê herêmê dernakevin. Her wiha bal kişand ser têkoşîna li dijî DAIŞ’ê û got:
“Wê Amerîka hebûna xwe ya leşkerî ya li Sûriye û Iraqê bidomîne.”
Serokê Fermandariya Giştî ya Amerîka Orgeneral Mark Milley di hevpeyvînekê de ligel televizyona El-Mamlaka ya Urdinê derbarê siyaseta welatê xwe ya Rojhilata Navîn de axivî.
Mark Milley diyar kir ku Rojhilata Navîn ji gelek aliyan ve ji bo DYA’yê herêmeke girînge û wiha got:
“Bi vê herêmê re hevaltî û hevkariyeke me ya nêz heye. Em dixwazin ev herêm aram bibe. Herêm çavkaniya sereke ya petrolê ye û çavkaniyên enerjiyê ji bo tevahiya cîhanê.”
Milley anî ziman ku ew ê têkiliyên xwe yên bi Rojhilata Navîn re bidomînin.
Her wiha destnîşan kir ku DYA naxwaze ji Rojhilata Navîn derkeve û diyar kir peymana Amerîka ya li herêmê wê gelek salan dewam bike.
Milley li ser pirsa gelo wê Amerîka hêza xwe ya leşkerî li herêmê zêde bike an na got:
“Ev girêdayî asta metirsiya wê demê ye.”
Milley: Hîna metirsiya DAIŞ’ê heye
Di dewamiyê de Milley balkişand ser hebûna DAIŞ’ê û wiha got:
“Hîna îdeolojî DAIŞ’ê zindî ye. Terorîstên wan hê jî li çolên Sûriye û Iraqê hene. Lewma hê jî ji bo me gefin. Em ê têkoşîna li dijî wan bidomînin.”
Milley: Ji bo tinekirina DAIŞ’ê hêjî hewildan pêwîste
Her wiha wî bal kişand ser wê yekê ku Amerîka wê hebûna xwe ya leşkerî ya li Sûriye û Iraqê bidomîne.
Milley diyar kir ku niha rewş ji berê baştir e, lê dîsa jî hewldanên pêwîst dixwaze.
Li aliyê din Milley, li ser pirsa dema DAIŞ bi temamî were tinekirin dê Amerîka ji vir vekişe yan na, got:
“Ev biryar di destê Serokê Amerîkayê Joe Biden û hikûmeta Amerîkayê de ye.”
