Hervrîn Xelef..
Sembola Aştiyê..
Jina ku li cîhanê deng veda..
Jina bi hêz û tekoşer û bedew..
Bi nazikbûn, bedewbûn û dilnizmiya xwe bi yasmînê hate binavkirin.
Hervrîn di 12’ê Cotmeha 2019 an ji aliyên çeteyên DAIŞ”ê li ser riya M4 ve hat hedefgirtin û şehîd ket..
Sê sal li ser şehîdkirina Hevrîn re derbas bû..
Lê li nava heval û hogirên xwe de jiyan dike,bi fikra xwe bi ramanên xwe..
Çîroka Hevrîn jî em niha tînin ser ekranê we..
Carna bi çirûskek ji awirên çavan, carnan bi pêlek ji deng, carna herikîna hestên dilsoz, carna bi heybet û xweragirî, carna bi asta têgehiştin û zanabûna xwe, carna jî hezkirina wê ya wekî çemên Kurdistanê bênavber diherikî, ew herikand nava dilê bi milyonan û da hezkirin.
Bayên ji bilindiya çiyayê Cudî diherikîn xwe li kezî û biskên wê dialand, li beriya Dêrika Hemko weke xifşexezalekê asî û serbilind bû lêger, heval, hogir û hevrêya bedewiyan Hevrîn Xelef.
Hevrîn Xelef, sala 1983’an li bajarê Dêrika Hemko çavên xwe li cihanê vedike.
Li nav malbateke welatparêz ku ji 4 bira û yek xwişkê pêk dihat mezin dibe.
Malbata Xelef, yek ji malbatên deverê yên dilsoz û xemxwerên têkoşîna azadiya Kurdistanê ye û zarokên xwe li ser wê çanda welatperweriyê mezin dike.
Wekî jineke xwedî exlaqekî baş, gotinên baş û kiryara baş, mirovek welatperwer û mirovperwer mezin dibe.
Hevrîn ji zarokatiya xwe ve keçek dilhebîn e û ji mirovan û xwezayê hez dike.
Ev taybetmendiyên wê nexşeya riya ku wê pê ve biçe jî diyar dike.
Hevrîn Xelef dibistana sereteyî, navîn û amedehî li Dêrikê bi serkeftî diqedîn e.
Li gel xwendinê xebatên hunerî de jî cih digr e.
Zanîngehê jî li fakulteya Endazyariya Sivîl a bajarê Helebê diqedîn e.
Piştî sala 2009’an êdî ji bo Hevrîn rêwitiyek nû destpê dike.
Ji ber xebatên dike, ji aliyê rejîma Suriyê ve tê şopandin û navê wê dikeve nava listeya “kesên ji bo dewletê bi xeter”.
Bi şoraşa 19’ê Tirmehê re di xebatên perwerde, rêxistinkirinê de cih digre.
Dema Rêveberiya xweser a Demokratîk di 21’yê Çileya 2014’an de tê damezarandin, Hevrîn dibe Cîgira Desteya Enerjiyê ya kantona Cizîrê û di 2015’an de jî weke Hevseroka Desteya Aborî ya Cizîrê tê hilbijartin.
Hevrîn Xelef di 27’ê Adara 2018’an de, weke Sekertera Giştî ya Partiyê tê hilbijartin.
Hevrîn wekî her karekê bi serkeftî pê rabûyî, di damezrandina vê partiyê de jî kedek mezin dide.
Hevrîn Xelef ji bo Sûriyeke demokratîk a pirrengî ya nenavendî, ji bo geşkirina wekheviya di navbera jin û mêr de û ji bo garantiya maf û azadiya tevahî jinan dixebitî.
Nasnameyên etnîk, zayend û baweriya mirovên herêmê çi dibe bila bibe, wê ji maf û azadiya hemû civaka Suriyê, taybet jinan ked û têkoşînek bê hempa dida.
Ji xwe tişta ku hişt Hevrîn Xelef bibe armanca êrişên dewleta Tirk a dagirker û çeteyên wê jî ev bû.
Piştî dagirkirina Efrînê, vê carê jî armanca dagirkeran û çeteyên wan bibû Serê Kaniyê û Girê Spî.
Di 12`yê Cotmeha 2019`an de Hevrîn Xelef li ser destê Komên çeteyên Ehrar El-Şerqiye yên girêdayî dewleta Tirk a dagirker li ser rêya M4 ya Eyn îsa hat şehîd xistin.
Ev êriş tenê ne li dijî destkeftiyên Şoreşa Rojava bû, heman demê li dijî tevahî nirx û rûmeta jin û mirovatiyê bû.
Di hemû jiyana xwe de bi qasî sînornenasiya dilê xwe azad jiya û bi şehîdbûna xwe re jî bû find û şemala ronahiyê û sembola jinên azad.
