Beşê Lêkolîn û Şopandinê yê Ronahî TV têkildarî operasyonên li dijî DAIŞê, tevgera çeteyên hikûmeta Şamê li Dêra Zorê û êrişên li dijî baregehên Koalîsyona Navneteweyî raporek amade kir.
Li gor vê raporê, di meha mijdarê de, 20 çeteyên DAIŞê û hikûmeta Şamê bi operasyonên QSD û Asayîşê hatine girtin û 2 jî hatine kuştin.
Her wekî di encama êrişên çeteyên hikûmeta Şamê de, 2 zarokan li Dêra Zorê jiyana xwe ji dest daye û 3 sivîl birîndar bûne.
Beşê lêkolîn û şopandinê yê Ronahî TV têkildarî êrişên dagirkeriya Tirkiyê, tevgera çeteyên DAIŞ, yên girêdayî hikûmeta Şamê û êrişên li dijî baregehên Koalîsyona Navnetewyî bi raporekê encamnameya meha mijdarê eşkere dike.
Li gor raporê, dagirkeriya Tirkiyê bi rengekî berdewam peyaman agirbestê ya sala 2019’an bin pê dike û êrişên xwe yên esmanî û bejayî didomîne.
25 kes di meha Mijdarê şehîd bûne
Di meha mijdarê de, 20 êrişên esmanî li dijî Bakur û Rojhilatê Sûrî pêk anîne û di encamê de 25 kes şehîd bûne, ji wan 13 sivîl in.
Her wekî 21 jî birîndar bûne.
Di meha Mijdarê de, 11 çeteyên DAIŞ bi destê QSD û Asayîşê hatin girtin
Li hêleke din, bi zêdebûna pêla xeteriya DAIŞ’ê re, Yekîneyên Antî Terorê yê QSD’ê û HAT yên Asayîşê 9 operasyon li dijî şaneyên DAIŞê pêk anîne.
4 li Reqa, 2 li Dêra Zorê û 3 jî li Hesekê pêk hatine.
Hêzên Koalîsyonê jî beşadarî piraniya wan bûne.
Li gor rapora beşê lêkolîn û şopandinê, 11 çete hatine girtin, yek ji wan xwedî nasnemeya iraqî ye û yekî din ji heman welatî jî hatiye kuştin
Di meha Mijdarê de, 7 êriş li dijî Koalîsyonê pêk hatine
Li tenişta van operasyonan jî, 7 êriş li hêla koma bi navê “Berxwedana Islamî li Iraqê” li dijî baregehên hevbeş ên QSD’ê û koalîsyonê, li Dêra Zorê û Hesekê pêk hatine.
Di meha Mijdarê de, 9 çeteyên hikûmeta Şamê hatine girtin
Rapor balê dikişîne ser êrişên komên girêdayî Hikûmeta Şamê jî û eşkere dike ku di meha mijdarê de 15 caran êrişî herêmên rojava û rojhilatê Dêra Zorê kiriye.
Di encamê de, 2 zarokan jiyana xwe ji dest daye û 3 sivîl jî birîndar bûne.
Li beramber vê yekê, Hêzên Sûriya Demokratîk û Asayîşê 5 operasyon li dijî wan pêk anîne û di encamê de 9 çete hatine girtin û yek jî di dema bersivdanê de hat kuştin.
