Girtiyên siyasî yên PKK û PAJK’ê di 27’ê Mijdarê de dest bi çalakiya gireva birçîbûnê ya dorveger kirin,grev di roja 16’de didome. Girtiyên girtîgeha Îzmîrê têkildarî çalakiya xwe nameyek nivîsandin û gotin: “Tevlî vê têkoşîna bi rûmet bibin”
Girtiyên siyasî yên PKK û PAJK’ê di 27’ê Mijdarê de dest bi çalakiya gireva birçîbûnê ya dorveger kirin.
Girtiyan diyar kirin ku çalakiya wan dê heta 15’ê Sibata 2024’an berdewam bike.
Çalakiya girtiyan di roja 16’emîn de berdewam dike.
Girtiyên li Girtîgeha Kiriklar a Îzmîrê tên ragirtin têkildarî çalakiya xwe nameyek nivîsandin.
“Li Kurdistanê komkujî li Filistînê rondikên derewîn”
Girtiyan di nameya xwe de bal kişandin ser êrişên Îsraîlê yên li dijî Xezeyê, êriş şermezar kirin û wiha gotin:
“Îro rastiyeke pir zelal e ku li hember derketina rewşa li Xezeyê hewcedariyeke mirovane ye. Lê belê tevî hikûmet û gelek derdorên ji ber tiştên li Xezeyê diqewimin diqêrîn, gazinan dikin û rondikên derewîn dirijînin, tenê carekê berê xwe nadin Kurdistanê. Yên ku jiholêrakinê ji bo kurdan rewa dibînin, li Filistînê rondikên derewîn dibarînin.”
Herwiha di nameye de hat gotin ku rêya çareserkirina pirsgirêkê jî bi şertê azadiya Rêber APO pêkan e ku gelê kurd ji xwe re weke Rêber diyar kiriye.
“Heta ku daxwazên me pêk neyên em ê çalakiya xwe berdewam bikin”
Girtiyan di dawiya nameya xwe de banga tevlibûna pêngav li gelên Kurdistan û Tirkiyeyê kirine û ev tişt gotin:
“Me wek girtiyên siyasî ji bo çareserkirina vê pirsgirêkê di 27’ê Mijdara 2023’yan de dest bi greva birçîbûnê ya bidem û dorveger kir. Heke ku ev daxwaza me ya rewa neyên pêkanîn, em ê çalakiya xwe bi awayeke dijwartir bidomînin. Em bang li her kesê xwedî rûmet dikin ku bila piştgiriyê bidin vê têkoşîna birûmet.”
“Çi dibe bila bibe em ê teqez serbikevin”
Jinên li Girtîgeha Jinan a Qeyseriyê jî tên ragirtin têkildarî çalakiya xwe bi rêya parêzerên xwe peyamek şand.
Jinan di peyama xwe de wiha gotin:
“Birêz Ocalan ji bo gelan pêdiviyeke girîng e. Êdî roj ev roj e.
Armanca girtiyan û daxwaza wan azadiya birêz Abdullah Ocalan e.
Hêviya me û armanca me her ku diçe mezin dibe.
Çi dibe bila bibe, em ê teqez serbikevin. Serkeftin ya me ye.”
Xizmên girtiyan: Ji bo piştgiriya girtiyan divê herkes xwedî helwest be
Malbatan girtiyan jî bang li her kesî kirin ku li dijî tiştên diqewimin dengê xwe bilind bikin û gotin:
“Ji bo piştgiriya girtiyan divê her kes xwedî helwest be û tişta jê tê bike, ger niha neke dibe ku sibê dereneg be”
