Berdevka Dîwana Wêjeyê ya Bakur û Rojhilatê Suriyê nivîskar Nerîman Evdike diyar kir ku beriya şoreşê zimanê kurdî li Sûrî qedexe bû, ji ber wê nivîskarên kurd bi dizî berhemên wêjeyî derdixistin û got: “Şoreşa Rojava di heman demê de şoreşa ziman jî bû.
Êdî kurd bi awayekî azad dinivisînin û ji aliyê wêjeyê ve pêşveçûnên mezin pêk tên.”
Li Bakur û Rojhilatê Sûrî, piştî avabûna Rêveberiya Xweser li her qadê jiyanê li gor fikra Neteweya Demokratîk xebatên jinûve avakirinê hatin destpêkirin.
Kurdên ku welat û zimanê wan ji aliyê dewletên serdest ve hatiye qedexekirin, bi şoreşa Rojava re şoreşa zimên jî dan destpêkirin.
Weke her qadên jiyanê ji aliyê huner û wêjeyê ve jî xebatên cur bi cur hatin destpêkirin.
Derbarê pêvajoya ziman û wêjeya kurdî de berdevka Dîwana Wêjeyê ya Bakur û Rojhilatê Sûrî nivîskar Nerîman Evdike axivî.
Berdevka Dîwana Wêjeyê Narîman Evdikê behsa pêşveçûna wêjeya Kurdî dike
Nerîman Evdike bal kişand ser xebatên wêjeyê yên piştî şoreşê û pêşveçûnên mezin pêk hatine û got:
Ji ber ku nivîsandina bi kurdî li Rojavayê qedexe bû, nivîskarên kurd rastî gelek zehmetiyan hatine.
Bi Şoreşa Rojava re wêje û zimanê kurdî di nava gel de bi rêjeyek zêde bi pêş ve çû.
Sazî û dezgeh bi awayekî fermî dikarin xebatên wêje û ziman bikin.
Narîman Evdikê: Piştî şoreşê Zimanê Kurdî zêde bi pêş ve çûye
Evdike bal kişand ser pergala Neteweya Demokratîk û bandora wê ya li wêjeya wan û got:
Bi sîstema demokratîk re ziman û wêje di nava civakên bakur û rojhilatê Sûriyê bêtir zindî bûn.
Êdî her civakek dikare xwedî li nasnameya xwe derkeve.
Û bi taybetî civaka kurdî.
Evdike têkildarî xebatên wan ên ji aliyê wêjeyê ve jî got:
Em bi salan e plansaziyên xwe derdixînin.
Wek Dîwana Wêjeyê di sala 2023’yan de me li bajarê Qamişloyê komxebata nivîskarên ciwan ên jin li dar xist.
Di komxebatê de nivîskarên jin ên ciwan ji mamosteyan ders girtin û nivîsên xwe nivisîn.
Em dixwazin vê komxebatê li bajarên din ên wekî Kobanê jî li dar bixin.
Narîman Evdikê: Divê Zimanê Kurdî di asta cîhanî de were bikaranîn
Berdevka Dîwana Wêjeyê ya Bakur û Rojhilatê Sûrî Nerîman Evdike wiha axaftina xwe bi dawî kir:
Ji ber bêstatubûna zimanê kurdî wêjeya kurdî li cîhanê di asta ku tê xwestin de deng venedaye.
Divê behtir xebatên wêjeyî bên kirin.
