Li Şerîda Xezayê li aliyekî şer û aliyekî jî hewldanên agirbestê heye.
Hemas daxwaz dike êdî li Şerîda Xezayê şer raweste û agirbest pêk were.
Îsraîlî jî di vî alî de metirsiyê xwe tînin ziman ku Hemas dîsa zindî bibe û êrîşan li dijî Îsraîlê pêk bîne.
Bi navbeynkariya welatên Ereb û Ewropî hewlên agirbestê û pevgurtina dîlan heye ku li ser vê yekê hevdîtinan didomin.
Peymana agirbestê ya Îsraîl û Hemasê di rojevê de ye.
Çavkaniyekî ji rewşê agahdar ragihand ku dibe ku di nava çend rojan de peymana agirbestê pêk were.
Beriya niha Hemasê anî ziman ku ew dikarin 20 kesên di nav de jin, temen mezin û nexweş berdin.
Lê Îsraîl jî daxwaza berdana 35 heta 40 kesên dîl kiribû.
Çavkanî eşkere kir ku Hemasê hîna daxwaza xwe yê bi dawî anîna şerê li Şerîda Xezayê bernedaye û her wiha di hevdîtinên bo agirbestê de li ser vê mijarê jî gotubêj bike.
Di vê navberê de Îsraîl gefa operasyona bejahî ya li dijî Refahê didomîne da ku zextê zêdetir bike li ser Hamasê.
Hewldanên peymana agirbestê ya Hemas û Îsraîlê
Televîzyona Kanala 12 ya Îsraîlê ragihand ku her çend siyasetmedarên Îsraîlî razî bûne ku ji korîdorê vekişin, lê derdorên ewlekarî yên Îsraîlî berteka xwe anîne ziman.
Ji ber ku yekîneyên ewlehiyê yên Îsraîlê ji vegera çekdarên Hemasê bo bakurê Şerîda Xezayê ditirsin, li ser daxwaza Hamasê ya vekirina korîdorê dudil in.
Kanala televîzyonê ya El-Qahîre El Îxbariye ragihand ku şandeya Hamasê şeva borî ji paytexta Misrê derketiye û dê bi bersiveke nivîskî bersiva pêşniyara rêkeftina agirbestê bide.
Çîn: Hemas û Fetih ber bi lihevkirinê pêş ve diçin
Her wiha Çînê ragihand ku komên dijber ên Filistînî Hamas û Fetih ku li Pekînê dicivin, ji bo lihevkirinê “pêşveçûneke teşwîq” bi dest xistine.
Berdevkê Wezareta Karên Derve ya Çînê Lin Jian ragihand ku nûnerên her du koman ji aliyê Çînê ve hatine vexwendin.
Lin teqez kir ku nûneran li ser gelek mijarên taybetî gotûbêj kirin û pêşketinên teşwîq kirin û got:
“Aliyan li hev kirin ku ev pêvajoya diyalogê bi mebesta hevgirtin û yekitiya Filistîniyan di demeke nêz de bidomînin.”
Josep Borell: Dê gelek welatên ye dewleta Filistînê nas bikin
Li aliyê din Nûnerê Bilind ê Polîtîkayên Derve û Ewlekariyê yê Yekîtiya Ewropayê (YE) Josep Borrell di çarçoveya civîna taybet a Forûma Aborî ya Cîhanê ya li Riyadê de daxuyaniyek da.
Borell di daxuyaniya xwe de diyar kir ku tê payîn ku gelek welatên endamên Yekîtiya Ewropayê heta dawiya meha Gulanê dewleta Filistînê nas bikin.
Serokên Îspanya, Îrlanda, Slovenya û Maltayê di daxuyaniyê de diyar kirin ku ‘dema şert û mercên guncaw bin’ ew amade ne ku Filistînê weke dewlet nas bikin.
Serokwezîrê Îspanyayê Pedro Sanchez berê jî gelek caran daxuyanî dabû û gotibû ku dê hikûmet dewleta Filistînê nas bike.
