Tahran êdî dixwaze cezayên ku Waşîngtonê li ser ferzkirine bi dawî bibin.
Ji bo vê yekê hemû hêviya xwe bi danûstandinên nukleerî yên li Viyanayê tên lidarxistin ve girê daye.
Lîderê Olî yê Îranê Ayetullah Elî Xamineyî diyar kir ku danûstandinên nukleerî yên bi Amerîkayê re baş pêşde diçin û ew li hember daxwazên zêde yên rêveberiya Amerîkayê li ber xwe didin.
Lîderê Olî yê Îranê Ayetullah Elî Xamineyî di bernameya fitarê ya ku bi rayedarên dewletê re ji bo meha Remezanê hat lidarxistin de li ser danûstandinên nukleerî yên bi Amerîkayê re axivî.
Ayetullah Elî diyar kir ku danûstandinên nukleerî yên bi DYA yê re baş pêşde diçin û tîma wan li hemberî daxwazên zêde yên rêveberiya Amerîkayê li ber xwe didin.
Ayetullah destnîşan kir ku Amerîkayê sozên xwe yên di rêketinama nukleerî da cih neanîne û wiha got:
“Amerîka îro bi cîbicî nekirina sozên xwe yên di rêketinama nukleerî de, xwe xistiye nav bendekê.
Tîma me, danûstandinên nukleerî bi awayekî baş dimeşîne.
Ew derbarê danûstandinan de Civata Ewlekariya Neteweyî û Serokomar agahdar dike, biryaran distîne û bi pêş ve diçe.”
Lîderê Olî yê Îranê daxwaz ji hikûmetê kir ku di polîtîkayên ku pêşxistiye de danûstandinên nukleerî bidomîne û wiha domand:
“Di dema pêşxistina siyasetê de li ser danûstandinên nukleerî nesekinin.
Bi ya xwe bikin, encama danûstandinan erênî be yan neyînî be.
Divê bandorê li polîtîkayên we neke.”
Xamineyî: Erebîstana Siûdî wê li Yemenê winda bike
Rewşa li Yemenê jî di rojeva Xameneyî de bû.
Xamineyî bal kişand ser şerê li Yemenê û diyar kir ku Erebîstana Siûdî di vî şerî de bi ser nakeve:
“Ez dixwazim di derbarê Yemenê de şîretan li rayedarên Siûdî bikim.
Ez vê yekê wekî şîreteke rast û ji dil dibêjim.
Çima hûn dewam dikin.
Şerê ku hûn ê teqez winda bikin?
Piştî ku paytexta Yemen Sana Îlona 2014’an kete destê Hûsiyan ji wê demê ve şerekî giran diqewime.
Li aliyekî hêzên hikumetê heye ku piştgiriyê ji Erebistana Siûdî werdigire, li aliyê din jî Hûsiyên piştgiriyê ji Îranê digre hene.
Li gorî NY 227 hezar kes ji ber nebûna avê, birçîbûn û nexweşiyê, bi giştî 377 hezar kes di şerê Yemenê de mirine.
Rewşa heyî ya li Yemenê weke krîza herî giran a mirovî ya li cîhanê tê pênasekirin.
