Çavê cîhanê li Îranê ye û rejîma Tahranê jî zexta li ser civakê zêde dike.
Li seranserê bajarên rojhilatê Kurdistan û gelek bajarên Îranê çalakiyên şermezarkirinê ên dijî kuştina Jîna Emînî dewam kirin.
Hêzên Îranê êrişî xwepêşanderan kirin û heta derengiya şevê gel li qadan bû.
Wezîra Karê Derve ya Almanya û Kanada jî li ser mijarê fikarên xwe anîn ziman û gotin;
Ew rewşê ji nêz ve dişopînin.
Li bajarên Îranê û Rojhilatê Kurdistanê, hêrsa li dijî rejîmê kêm nabe.
Kuştina Jîna Emînî ya 22 salî ku li Îranê ji aliyê ‘polîsên exlaqî’ ve pêk hatî, bû sedema rûdana pêleke mezin a hêrsa gel.
Di xwepêşandanan de heta niha herî kêm 5 kes ji aliyê hêzên dewletê ve hatine kuştin û herî kêm 250 kes jî hatine girtin.
Xwepêşandan li bakurrojava û herêmên navîn ên Tehranê, li gelek bajarên mîna Tebrîz, Arak û Îsfahanê jî belav bûn.
Duh bi şev heta derengiya şevê xwepêşandêran li dijî hikumetê dirûşm qîriyan, wesayitên polîsan şewitandin, bend danîn ser rê û meşiyan.
Di dîmenên li ser medya dîjîtal hatin parvekirin, tê dîtin ku li bajarê Raştê xwepêşandêrên agir berdidin wesayita polîsan.
Xwepêşandêrên ku li Meşhedê daketin qadan li pêşiya Dadgeha Şoreşê ya bajêr derketin ser wesayitên polîsan ên bi dest xistibûn û gotin “Em komara Îslamê naxwazin.”
Li bajarê Sarî jî çalakgerên jin dîlan kirin, paçên li ser serê xwe danîn û şewitandin.
Jinan gotin, “We welat kirin mîna xirbeyekî, em ê we di binê vî xirbeyî de binax bikin.”
Li bajarê Tebrîzê çalakgeran bend danîn ser rê û li hemberî polîsan şer kirin.
Li bajarê dîrokî yê Îranê li Şîrazê jî çalakgeran bombeya gazê ya polîsan li wan vegerandin.
Li bajarê Kurdistanê Kirmaşanê jî gel dakete qadan, lê belê polîsan bi çekê bersiv dan.
Li Pîranşarê jî bend hate danîn, agir hate dadan û dirûşma “Jin, jiyan, azadî” hate qîrîn.
Wezîrên Karên Derve yên Alman û Kanada: Em rewşê ji nêz ve dişopînin, divê ev peyam bigihêjin berpirsan
Kuştina Jîna Emîn û xwepêşandanên li Îran û rojhilatê Kurdistanê ji aliyê cîhanê ve jî ji nêz ve tê şopandin.
Wezîra Karê Derve ya Almanya Annelena Baerbock ku ji bo civînên Civata Giştî ya Neteweyên Yekbûyî (NY) li New Yorkê bû, daxuyaniyek da.
Baerbock diyar kir ku divê mafên jinan weke mafên mirovan bên qebûlkirin û got,
“Jin niha dadikevin qadan. Ji bo jiyana xwe bifikarin, bêyî ku bi tenê bihêlin azadiya xwe pêşkeftinê dixwaze.”
Baerbock destnîşan kir ku divê ev peyam bigihêje berpirsyaran.
Wezîra Derve ya Kanadayê Melanie Joly jî got; ew rewşa li Îranê ji nêz ve dişpînin.
