Navenda Şopandin û Koordînasyona Hilbijartinê ya HDP û Partiya Çepên Kesk diyar kir ku li dijî hîleyên hilbijartinê hemû cureyên tevdîran girtine û gotin: “Tevî hîleyên îktîdara AKP-MHP’ê jî em ê sindoqan biparêzin.” Koordinasyonê her wiha bang li her kesî kir ku xwedî li sindoqan derkevin.
Navenda Şopandin û Koordînasyona Hilbijartinê ya Partiya Demokratîk a Gelan (HDP) û Partiya Çepên Kesk, têkildarî hilbijartinên 14’ê Gulanê daxuyaniyeke nivîskî weşand.
Koordînasyona Hilbijartinê ya partiyan bal kişand ser îxtîma hîleyan a di hilbijartinan de û wiha hate gotin:
“Tevî êrişên îktîdara AKP-MHP’ê ku tevahiya derfetên dewletê ji bo kampanyaya xwe bi kar tînin jî me xebatên pir baş û berhemdar kirin.
Em baş di ferqa fikarên gel ên têkildarî hîle û lîstikên îktîdarê yên ji bo hilbijartinê de ne.
Tevî hîleyên îktîdara AKP-MHP’ê jî em ê sindoqan biparêzin.
Em ê nehêlin tenê yek dengê me bidizin û dê nehêlin vala biçe.”
“100 Hezar partiyî û 3 hezar hiqûqnas amadene dengan biparêzin”
Navenda Şopandin û Koordînasyona hilbijartinê diyar kir ku wan li dijî hîleyên desthilatdariyê tedbîr girtine û wiha domand:
“Wê zêdetirî 100 hezar partiyiyên me yên dilxwaz di roja hilbijartinê de sindoq û dengan biparêzin.
Li gel dilxwazan, her wiha 3 hezar hiqûqnasên me ku dê mudaxaleyî nelirêtiyan bikin û îtîraz bikin hatine peywirdarkirin.
Komîsyona me ya navendî dê bi awayekê hemwext daneyên li databasa YSK’ê hatine barkirin bişopînin. ”
“Divê herkes xwedî li sindoqan derkeve”
Navenda Şopandin û Koordînasyona Hilbijartinê ya HDP û Partiya Çepên Kesk di dawî de bang li her kesî kir ku xwedî li sindoqan derkevin.
Ramazan Yavûz: Divê her kes xwedî li sindoqên li taxa xwe derkeve
