Wezareta Parastinê ya DYA Pentagonê ragihand ku ew ê bombeyên misket bişînin Ukraynayê.
Ev bombe di qada navnetewî de ji aliyê hilberandin û karanînê ve hatiye qedexekirin.
NY jî ji bo vê yekê hişyariyê dide.
Dewletên Yekbûyî yên Amerîkayê (DYA) ragihand ku ew ê ji Ukraynaya ku li dijî Rûsyayê şer dike, cebilxaneyên bombeyên misketê bişînin.
Wezareta Parastinê ya Amerîkayê (Pentagon) ev yek bi rêya daxuyaniyekê eşkere kir.
Pentagonê diyarkirin ku di çarçoveya pakêta çekan a nû ya ku ji Ukraynayê re tê şandin de, bombeyên misket heye.
Şêwirmendê Ewlekariya Netewî ya Amerîkayê Jack Sullivan got; Şandina cebilxaneyên bombeyên misket bo Ukraynayê biryareke “dijwar” lê pêwîst e.
Sullivan da zanîn ku Ukrayna bi lezgînî pêdivî bi cebilxaneyên zêde heye da ku êrîşên Rûsyayê bişkîne û li dijî êrîşan dewam bike.
Bombeyên misket di nava çekên qedexekirî de ye
Li gorî pisporên leşkerî, bombeyên misket dikarin alîkariya Ukraynayê bikin, nemaze di êrîşên li dijî leşkerên rûsî yên ku xwe di xendekan de vedişêrin.
Lê belê bikaranîna van bombeyan di nav wan çekên ku li ser asta navneteweyî hatine qedexekirin de ye.
Ev bombe ji hewayê de têne berdan û li qadeke berfireh belav dibin.
Piraniya wan yekser nateqe.
Ji ber vê sedemê ev teqemeniyên ku metirsiya teqîna wan a paşerojê heye, bi taybetî ji bo sivîla metirsiyeke mezin çêdike.
Peymana Osloyê ku di sala 2010’an de ket meriyetê, çêkirin, hilanîn, bikaranîn û hinardekirina bombeyên misket qedexe dike.
Lê belê, Amerîka û Ukrayna peyman îmze nekiribûn.
Rûsya û Çîn jî di nav welatên ku ne alîgirê peymanê de ne.
Di şerê Rûsyayê yê li dijî Ukraynayê de, her du alî bi hev re bombeyên misket bikar anîn.
Hikumeta Almanya di rexnekirinê de dudilî ye
Biryara Amerîka ya şandinê di nava cîhanê de jî deng veda.
Hikumeta Almanya li ser şandina van bombeyan dudilî ye.
NY ji ber şandina bombeyên misket bo Ukrayna hişyarî da
Neteweyên Yekbûyî (NY) derbarê bikaranîna bombeyên navborî de hişyarî da.
Berdevkê Ofîsa Komîseriya Bilind a Mafên Mirovan a NY got, “Ev cebilxane piştî ku şer biqede jî mirovan dikuje û seqet dike.
Ji ber vê sedemê divê bombeyên misket bên rawestandin.
Berdevk bang li Rûsya û Ukraynayê jî kir ku Peymana Osloyê îmze bikin.
