Moskow ji Konseya Ewlekariyê ya NY daxwaz kir ku bo 6 mehê din alîkarî di ser deriyên di bin kontrola dagirkeriya Tirkiyê re ye derbasî Sûriyê bibe.
Swîsre, Brezîl û DYA jî pêşniyarên xwe yên cuda heye.
Rûsya li Sûriyê careke din bi hewara dewleta Tirk a qirker ve diçe.
Moskow li Konseya Ewlekariyê ya Neteweyên Yekbûyî (NY) pêşniyar kir ku alîkariya mirovî di ser Tirkiyê re derbasî Sûrî bibe.
Bi gotineke din, alîkariya beriya niha dihat şandin, bo 6 mehên din were dirêjkirin.
Ev pêşniyar doh pêşkêşî 15 endamên konseyê hat kirin.
Her çiqasî hikumeta Şamê ji 2014’an ve li dijî vê yekê ye, lê Moskowv bi şandina alîkariya di ser deriyên bi Tirkiyê re îsrar dike.
Çavdêrên siyasî dibêjin Rûsya bi vê yekê dixwaze Tirkiye nêzî xwe bigre.
Pêşniyarên şandina alîkariyê bû Sûrî li NY dikeve dengdanê
Beriya pêşniyara Rûsya, Swîsre û Brazîlya jî pêşniyarek pêşkêş kir.
Swîsre û Brazîlya dixwazin dema bikaranîna dergehê Bab El-Hewa bo 12 mehên din bê dirêjkirin.
Alîkariya di dergehên di bin kontrola dagirkeriya Tirkiyê re têne şandin jî ji aliyê çeteyên wê ve tê talankirin.
DYA dixwaze alîkarî di 3 dergehan re derbas bibe
Li aliyekî din DYA jî dixwaze pêvajoya derbaskirina alîkariyan bo salekê were dirêjkirin û alîkarî di 3 dergan re derbas bibin.
Konseya Ewlekariyê 10 Tîrmehê wê dengdanê li ser pêşniyara Swîsre-Berazîl û Rûsyayê bike.
Li Konseyê ji bo pêşniyarek were erêkirin pêwistî bi 9 dengên “erê” heye.
Tevî wê jî divê yek ji 5 endamên dayîmî yê konseyê (DYA, Ingilîstan, Fransa, Çîn û Rûsya) biryarê veto neke.
2014’an konseyê derbasbûna alîkariyan ji Iraq, Urdin û 2 dergehên bi Tirkiyê re pêşniyar kir.
Rûsya û Çîne ev biryar veto kirin û tenê dergehê Bab-El-Hewa weke tekane deriyê alîkariyê destnîşan kirin.
NY daxwaza 5,4 milyar dolar alîkarî bo Sûriyê dike
Koordînatorê karûbarên mirovî yê NY Martin Griffiths diyar kir, NY ji bo Sûriyê 5,4 milyar dolarê Amerîkî ji bo sala 2023’an dixwaze, lê heta niha tenê ji sedî 12 ê van pereyan hatiye berhevkirin.
Her çiqasî Rêveberiya Xweser a Bakur û Rojhilatê Sûriyê daxwaz dike ku deriyê Til Koçer careke din bo alîkariya mirovî bê vekirîn jî ev yek tê redkirin.
Rûsya û Çînê 2020’an daxwaza girtina dergehê navborî kiribûn.
Vê yekê jî raste rast bandoreke neyînî li ser jiyana bêtirî 5 mîlyon kesê li herêmê kir.
