Îsraîl û Hemas ji bo mijara girtiyan nêzî lihevkirinê bûne.
Qeter ya navbeynkariyê dike, ji danûstandinan bihêvî, lê Amerîka û Îsraîl lihevkirinê ne ‘erê’ dikin, ne jî ‘red’ dikin.
Rêxistina Tenduristiya Cîhanî ragihand ku 31 pitik ji nexweşxaneya Şîfa hatine veguhestin.
Di roja 45’an a şerê Îsraîl û Hemasê de, alî ji bo mijara girtiyan nêzî hev bûne.
Rêveberên Amerîkî û Îsraîlî ragihandin ku peymana azadkirina hin dîlên di destê Hemasê de ber bi dawîbûnê ve diçe.
Li gor nûçeya Reutersê, rayedarekî Koşka Spî jî diyar kiriye ku di danûstandinan de pêşketin henen.
Qeter ji lihevkirina Îsraîl û Hemasê bihêvî ye
Ji Qeter a tê gotin mazuvaniya navbeynkariyê dike, daxuyaniyeke xweşbîn hat.
Serokwezîrê Qeterê Şêx Mihemed Bin Ebdulrehman el-Sanî di konfêranseke rojnamevanî li Dohayê de got;
Astengên li ber rêkeftinê niha “pir biçûk” in û tenê mijarên “pratîk û lojîstîkî” mane.
Rojnameya Washington Postê di raporta xwe ya roja şemiyê de îdia kir ku lihevkirinek pêk hatiye ku şer bo pênc rojan rawestin û bi dehan jin û zarokên dîl bên berdan.
Lê ev îdia ji aliyê Serokwezîrê Îsraîlê Benjamin Netanyahu û rayedarên Amerîkayê ve hat redkirin.
Koşka Spî diyar kir ku ji bo lihevkirinê hewldan didomin.
Îsraîl ragihand ku di êrîşa Hamasê ya 7’ê Cotmehê de nêzî 1200 kes ku piraniya wan sivîl in hatine kuştin û derdora 240 kes jî dîl hatine girtin.
Piştî vê dîrokê di êrîşên Îsraîlê yên li ser Xezeyê yên di bin kontrola Hamasê de bêtirî 13 hezar Filistînî ku piraniya wan zarokin hatin kuştin.
Îsraîlê dîmenê li nexweşxaneya El-Şîfa weşand
Artêşa Îsraîlê dîmenên ku tê îdiakirin di roja êrîşa Hamasê ya 7’ê Cotmehê ya li Xezeyê de 2 dîl anîne Nexweşxaneya El-Şîfa ya Xezayê weşand.
Artêşa Îsraîlê diyar kir ku yek ji kesên di vîdeoyan de hemwelatiyê Nepalê ye û yê din jî welatiyê Taylandê ye.
Berdevkê artêşê Daniel Hagari ji rojnamevanan re got, wan hîna nekariye “girtiyên” di vîdyoyê de bibînin.
Îsraîl hefteya borî bi ser nexweşxaneyê de girtibûn.
WHO: 31 pitikên pêşwext ji dayîk bûne ji nexweşxanê hatine derxistin
Neteweyên Yekbûyî (NY) ragihand ku xebatkarên tenduristiyê yên Filistînî 31 pitikên pêşwext ji dayîk bûne, ji Nexweşxaneya El-Şîfa derxistin.
Rêxistina Tenduristiyê ya Cîhanî (WHO) ya girêdayî NY’yî diyar kir ku pitik rakirin nexweşxaneyeke li başûrê Xezayê.
WHO ragihand ku 11 ji pitikên ku ji ber kêmasiyên tibbî li nexweşxaneyê ji dayîk bûne rewşa wan giran e û 2 jî ji ber kêmderfetiyê mirin e.
Di hilbijartinên Arjantînê de Ekonomîstê Ultra-Lîberal Milei bi ser ket
