Li ser erdê jî, bi hezaran çeteyên ku Tirkiye ew anîne Lîbyayê, ku piraniya wan çeteyên DAIŞ’ê ne, li bajarê Sebrata yê li rojavayê Lîbyayê kom bûne û gefê li ewlehiya herêmê û ya Ewropayê jî dixwin. Ji bo dîtina çareseriyekê ji aloziya Lîbyayê re jî, serokê Parlemena Lîbî Uqeyle Salih çûye Qahîrayê û tê payîn ew gelek hevdîtinên navdewletî û herêmî pêk bîne.
DAIŞ careke din bi rêya dewleta Tirk li Lîbyayê zindî dibe..
Ji berpirsyarê artêşa niştimanî ya Lîbyayê Xalid Mehcûb ragihand ku DAIŞ li Lîbyayê ji nû ve zindî bûye, ew jî piştî ku bi hezaran çeteyên dewleta Tirk li bajarê Sebrata yê li rojavayî welêt kom bûn.
Mehcûb diyar kir ku nêzî 3 hezar çeteyên ku Tirkiye ew anîne Lîbyayê, ku piraniya wan Tûnisî ne, girêdayî DAIŞ’ê ne û piştî bidawîbûna şerê li Terablusa paytext, li bajarê Sebratayê kom bûn.
Xalid Mehcûb da zanîn ku desteserkirina vî bajarê ji aliyê çeteyan ve, metirsiyê li ser ewlehiya Tûnisê ku tenê 100 km dûrî bajêr e, her wiha metirsiyê li ser ewlehiya Ewropayê jî çêdike.
Tê zanîn, sala 2016’an, bajarê Sebrata navenda rêxistina DAIŞ’ê bû û çeteyan amadekariya êrîşê li ser Tûnisê dikir, lê Amerîka bi êrîşeke asmanî li ser bajêr, 49 çete kuştin û rê li ber êrîşa li ser Tûnisê girt.
Uqeyle Salih, li Qahîrayê, dest bi hevdîtinan dike
Di warê siyasî de jî, Serokê Parlemena Lîbyayê Uqeyle Salih, li Qahîrayê, dest bi hevdîtnên herêmî û navdewletî ji bo çareserkirina aloziya Lîbyayê dike.
Rojnmeya Şerq El-Ewset eşkere kir ku Salih wê destpêkê bi balyozê Amerîka yê li Qahîrayê Jonathan Cohen re bicive, piştre jî wê bi çend şandeyên Ewropî re hevdîtinê bike, her wiha wê bi serokatiya Misirê re jî aloziya Lîbyayê nîqaş bike.
Ji aliyê xwe ve, balyozê Amerîkî li Lîbyayê ragihand ku ew bi rêya telefonê bi Fayiz Serac re axiviye û mijarên rawestandina destwerdanên derve, kêmkirina şer û hewldanên çareserkirina aştiyane ji aloziya welêt re nîqaş kirine.
Balyozxaneya Amerîkî ya li Lîbyayê teqez kir ku ew ê têkiliyê bi hemû aliyên Lîbî re bike, heta gihîştina çareseriyê û rawestandina şer.
Di heman demê de, li bajarên Terablus û Zawiyê, li dijî hikumeta Wîfaqê ya Ixwanî, xwepêşandan hatin lidarxistin.
