Li Urdinê, derbarê aloziya navbera Filistîn û Îsraîlê de, wezîrên karên derve yên Urdin, Misir, Fransa û Almanyayê tevî nûrnerek Yekîtiya Ewropayê civiyan.
Tifaqên Îmarat û Behreyên yên bi Îsraîlê bi erênî hatin nirxandin û hêviya destpêkirina diyalogan navbera Filistîn û Îsraîlê de hat kirin.
Îro li paytexta Urdin Emanê bi riya enternetê wezîrên karên derve yên Urdin, Misir, Fransa û Almanyayê tevî nûrnera Yekîtiya Ewropayê ya ji bo aştiya li Rojhilata Navîn civiyan.
Di civînê de hewildanên aştiyê li herêma Rojhilata Navîn hatin nîqaş kirin, mijara sereke jî aloziya navbera Filistînê û Îsraîlê bû.
Wezîrê Karên Derve yê Misirê, Samih Şikrî, got ku tifaqên aştiyê yên navbera Îsraîl, Îmarat û Behreynê wê aştiyeke dayîmî bîne herêmê.
Şikrî: Divê dewleteke Filistînî li gorî sînorên 1967’an were avakirin
Samih Şikrî destnîşan kir ku divê dewleteke Filistînî serbixwe li gorî sînorên 1967’an ku paytexta wê Qudisa Rojhilat be were avakirin.
Şikrî got ku ji bo piştgiriya doza Filistînê, ew bi Behreyn û Îmarat tevî hemû dewletên Ereb hevkariyê dikin.
Ji aliyê xwe ve, Wezîrê Karên Derve yê Fransayê, Jean-Yves Le Drian, tifaqên aştiyê yên bi Îsraîlê re bi erênî nirxandin.
Le Drian amadebûna Fransayê ji bo destpêkirina diyalogan nîşan da
Jean-Yves Le Drian diyar kir ku ji bo pêkanîna aramiyê li herêmê, divê aloziya navbera Filistîn û Îsraîlê de were çareserkirin û du dewlet werin avakirin.
Le Drian amadebûna welatê xwe ji bo hevkariya di destpêkirina diyalogên navbera Filistîn û Îsraîlê de nîşan da.
El-Sidfî: Prensîba xak beramberî aştiyê ji bo me weke bingehekê ye
Her wiha Wezîrê Karên Derve yê Urdinê, Eymen El-Sidfî axivî û destnîşan kir ku ji bo doza Filistînê û pêkaîna aştiya dayîmî ew ji bo destpêkirina danûstandinên rastqîn di xebatan de ne.
Eymen El-Sidfî got:
“Ji bo dîtina çareseriyekê ji doza Filistînê re, prensîba xak beramberî aştiyê ji bo me weke bingehekê ye .”
Di 15’ê Îlonê de, Îmarat û Behreynê bi Îsraîlê re tifaqên aştiyê îmze kiribûn
Hêjayî gotinê ye, di 15’ê Îlonê de, ango beriya 9 rojan, di şahiyekê li Koşka Spî li Washingtonê Îmarat tifaqa aştiyê bi Îsraîlê re îmze kir û Behreynê jî tifaqa piştgirya aştiyê pê re îmze kir.
Serokê Amerîka, Donald Trump, ev tifaq ji bo pêkanîna aştiyê li herêma Rojhilata Navîn weke tifaqên dîrokî bi nav kirin.
Piştî îmzekirina van tifaqên jî, Serokwezîrê Îsraîlê, Binyemîn Netenyaho, da bû zanîn ku wê çend dewletên din jiblî Îmarat û Behreynê wê bi wan re tifaqên aştiyê pêk bînin.
