Di dawiya Foruma Şoreşa Jinê ku li Qamişloyê 2 rojan dewam kir, encamname hate weşandin.
Di encamnameyê de ji bo jinan gelek xalên girîng hatin diyar kirin.
Di dawiya Foruma Şoreşa Jinê ku li Qamişloyê 2 rojan dewam kir, encamname hate weşandin.
Di encamnameyê de hat diyar kirin forum bi boneya salvegera 10. a Şoreşa 19 Tîrmehê ji aliyê 7 rêxistinên jinan yên mîna Kongra Star, Akademiya Jineolojî, YPJ, Kombûna Jinan a Zenobya, Yekîtiya Jinên Suryan, Meclîsa Jin a Bakur û Rojhilatê Sûriyê û Meclîsa Jin a Sûriyê ve, hat lidarxistin.
Hat gotin armanca sereke ya lidarxistina kombûnê nirxandina pêvajoya şoreşa jinê û ji bo parastin û geşkirina şoreşa jinê afirandina perspektifê bû.
Di encamnameyê de hat diyar kirin gelek jinên ji Rojhilata Navîn û welatên cuda jî bi rêya weşana zindî Forum şopandin.
Di komxebata du rojan de ev tespît hatin kirin;
- Di 10 salên şoreşê de gavên dîrokî hatin avêtin û ji bo tevahî jinan destgeftên mezin hatin afirandin. Ev destkeftiyên şoreşa jinê ji bo tevahî cîhanê bûne hêvî. Ji bo mezinkirin û mayîndekirina vê şoreşê di Foruma me de biryara bilindkirina têkoşînê hat girtin.
- Şoreşa jinê bi êrişên tund re rû bi rû ye û hîn jî hemû armancên xwe pêk neaniye. Ji bo mîsogerkirina şoreşa jinê pêwist e em destkeftiyên wê herdem zêde bikin û bikin malê hemû jinan.
- Qanûnên jin wek destgeftiyeke sereke ya şoreşê hat nirxandin. Ji bo pêkanîna qanûnên jin divê ku di asta Sûriyê de têkoşîn bê meşandin û xurtkirin.
- Di asta Sûriyê de pêkanîna kombûneke jinan ya wiha bi xwe serkeftineke mezin e, lê di heman demê de girîngiya pêşxistina tifaqên demokratîk a jinê dide ber çav. Pêwist e em hevgirtina jinan di asta Sûriyê de hîn bêhtir xurt bikin.
- Bi zanebûna ku şoreşa jinê berî her tiştî şoreşeke hişmendî ye em biryara bilindkirina têkoşîna hişmendiya azadiyê didin.
- Rizgarkirina hemû jinan ji dagirkerî, hêsîrî û zindanan erka me ya sereke ye. Bi vê armancê em ê têkoşîna xwe bilind bikin. Bi taybet ji bo ku bajarên wek Efrîn, Bab, Cerablus, Ezaz, İdlib, Serêkaniyê û Girê Spî yên ku di bin dagirkeriya dewleta Tirk û çeteyên wê de ne bên rizgarkirin divê em têkoşîna xwe xurtir bikin.
- Êrîşên qirkirinê herî zêde jî li ser jinê tên meşandin. Divê jin li hember hemû cureyên êrîşê, ku ji aliyê hêzên dagirker û hişmendiya mêrperest ve pêk tên xwedî hêza xwe parastin be û divê yek jinek jî bê parastin nemîne.
- Bi zanebûna ku çareseriyeke demokratîk û mayînde bê îradeya jin ne gengaz e divê beşdarbûna jin di biryarên siyasî de bê mîsoger kirin û mafên jinan bi nêrîna jinan di destûra Sûriyê a pêşerojê de cih bigrin.
